ب بورينا تەمەنێ سياسى ل كوردستانێ هەر ژ سەردەمێ ژێر دەستهەلاتداریا حكومەتا بەعس و تا نوكە کو بووینە خودان حکوومەتەک ئازاد و ب ناڤ ديموکراتى، لێ ئەڤە ژی یا ڤەلا نەبوو ژ دزیكرن، وەلاتفرۆتن و گەندەلىێ ژلایێ کەسێن پلەبەرز و خودان كورسی. دنوكەدا سەرۆکى حكومەتا كوردستانێ (مەسرور بارزانى) دبێژیت کو چاكسازى دێ ژ هەمى بەرپرسان گریت، ژ پلەبەرزان تا نزمترين پلە. بەلێ پرسيار ئەڤەيە ئایا دێ شێن ژ پلەبەرزان دەستپيبكەن؟ وێ گاڤێ يێن دى بخۆ نەوێرن تشتەکی بکەن ئەگەر ب هاريكاريا پلەبەرزان نەبيت. ئەرى بەڕێز مەسرور بارزانى دى شێت ژ هەردوو مالباتێن بەڕێز (تالەبانى و بارزانی) دەستپێكەت کو هندەک جاران ناڤێن هندەک کەسێن سەر ب ڤان مالباتان ژی دهێت؟! دچەند سالێن چووییدا گەلەک بەحسا چاكسازى و سازانێ دهاتە کرن. لێ ژبلی ئاخفتنێ هيچ تشتەکێ دی نەهاتە کرن و ما بێ کریار! ئەڤە دووبارە بەحسا چاکسازیێ هاتە کرن و دویڤدا مسۆگەر دێ بەحسا سازانێ هێتە کرن و پشتی وێ ژی دێ بەحسا پێکڤەژیانێ و…!
ب راستی مە هيڤى ب كابينا نوى هەبوو، لێ ژ ئاخفتنا دەستپێکێ تشتێ دووبارە دیاربوو. مووچەیێ پێشمەرگەى دمەها ئێکێدا و پێشمەرگەیێ زێرەڤانى چەند رۆژان گيروبوو و هێشتا دەيندارێن پشمەرگەينە! چار مووچەیێن وان چ لێ هاتن کو حكومەتا عيراقێ هنارتیە، كيڤەچوون؟! پشتى چەند مەهێن ژ شەلەلبوونا حكومەتا نوى مە چاڤەڕێ دكر دەما پێكئينانێ بڕيارێن د بەرژەوەنديا خەلكى دا بێن دان و كار ئێدى بۆ خۆشكرنا ژيارا خەلكى بيت و گەنجێن مە ئێدى ب كار بكەڤن. لێ مخابن چ نیشانێن باشیێ دیارنینن و ئالۆزیێن نەبوونا کارەبێ، گرانبوونا ئاڤێ و نەهاتنا مووچەی هاتینە پێش. لەوما دبێژین ل جهێ دووبارەكرنا پەيڤا چاكسازیێ بلا تشتەك نوى بکەن و بەسە ژ گوتنێن بێ كريار.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)
