سەد سالا بەرى نهۆ رێكکەفتنا سايكس- بيكۆ هاتبوو ئيمزاكرن كو ئێك ژ بڕگێت وێ دابەشبوونا مەزنترين دەولەتا كوردى بوو بۆ چوار پارچا. ئەڤە راستيەكا حاشاهەلنەگره، كوردستانا باكوور ل توركيا، كوردستانا رۆژهەلات ل ئێرانێ، كوردستانا رۆژ ئاڤا ل سوريا و كوردستانا باشوور ژی ل كۆمارا عێراقێ يه. هەر ئێك دچارچۆڤێ دەولەتەکێ دا سياسەتا خۆ دكەتن. تاكه پارچه كو بوويه هەرێمەكا سەربەخۆ باشوور بوو ل عێراقێ. ئەوژى ب سياسەتا سەرۆك مەسعوود بارزانى و نێچيرڤان بارزانى سەرۆكێ هەرێما كوردستانێ و مەسرور بارزانى سەرۆكێ حكومەتا هەرێما كوردستانێ يه. هەرێمەكه خودان ياسا و پەرلەمان و حكومەته. خوەزييا هەر تاكەكێ كورده هەرسێ پارچێن مايی ژى ببنه هەرێم و دەولەتا سەربەخۆ هەبيت، لێ چاوا؟ سياسەتا راست و دروست دوير ژ كارێن تێكدەرانه و تيرۆرى رەگەزپەرستى هەرێما كوردستانێ ب خوينا هزارەها شەهيدا و گەنج و رۆلێن كورد ب دەهان شۆرەش و داستانا هەر ل سەر دەمێ مەلك فەيسەل و عەبدولكەريم قاسم هەتا سەدامێ دكتاتۆر خەباتەكا ب وەجان و بەردەوام هاتە کرن. هەتا شيای ئەڤرۆ ب دەست خوڤه بینیت. ل رۆژهەلاتا ناڤەراست ب گشتى و ب تايبەتى ل عێراق، سوريا، توركيا و ئێرانێ بارودۆخەكێ هەستيار و ناسك ب رێڤەیە. هەرێم ژى بێ بار نەبوويه ژ ڤان بارودۆخان. نويترين نەخۆشی شەرێ داعشێ يێ چەپەل بوو. لێ ئالیێ دی يێ خرابکرنا رەوشا ئێمناهیا هەرێمێ حزبا پەكەكێ يه حزبەكا چەكدار و بێ پاشەرۆژ يا گرێدايه سياسەتا رۆژانه ڤه ب سەعەتا سياسەتا وێ دهێتە گهۆرین و هیچ ستراتیژیەک د ناڤدا ناهێتە دیتن. نها ژی داردەستێ دەولەتێن جيرانایە و بوويه سترى بۆ هەرێما مه.
نها کو دبینین بۆ چەندین سالانە هاتيه ناڤا هەرێما کوردستانێ بێ كو چ ئارمانج هەبن، خرابی زێدەتر رۆژانه تۆپبارانا دەولەتا توركيا ل سنورێن مه ب مەرەما هەبوونا چەکدارێن پەكەكێ يه، هاوولاتی شەهيد دبن مال و مولك ئاڤەدان نابن گوند چول دبن. بۆ نموونه تنێ ل دەڤەرداریا ئامێدیێ 366 گوند يێت هەيین 100 گوند تنێ ئاڤەدانن. سياسەتا پەكەكێ و ئاخا پەكەكێ نه ل هەرێما کوردستانێ یە، بەلكو ل باكووره. باژێرێن باكوور بلا رزگار بكەن ئامەد، دياربەكر و…هتد. نێچيرڤان بارزانى، سەرۆکێ بەرێ حکوومەتا هەرێمێ و سەرۆکێ نها یێ هەرێمێ زۆر جاران ناڤبژيڤانى ناڤبەرا توركيا و پەكەكێ دا كريه و ئاگربەست راگەهانديه. هەروەسا د نووترين پێشهاتدا مەسرور بارزانى ئاماژه ب هێوركرنا بارودۆخێ سياسەتا پەكەكێ و توركيا كريه. ئەڤا پەكەكه دكەت يا دروست نينه شينا ئالۆزيێ بۆ هەرێمێ چێكەت و مينيته شنگالێ و دەڤەرێن ڤەقەتيای بلا بچن كوردستانا باكوور ئازادبكەن. هەرێمێ رێسا و ياسا و پێشمەرگەهێ خۆ يێ هەی خودان ئارمانجه. چ تشت ب شەرى ناچنه سەر، بەلکو ب دانوستاندن و گفتوگۆ ل سەر مێزێ دێ گەهيه هەمى ئارمانجێن خۆ. زیانێن شەری پتره ژ باشيێن وێ ل سنورێن هەرێمێ هاوولاتى نەشێت كشتوكالی بكەتن دەخل و دەرامەتێ خۆ ئاڤەدان كەتن، ژ بەر تۆپبارانا دەولەتا توركيا. هەلبەت نه ئامادەبوونا پەكەكێ ل كوردستانێ چ هێجەت نامينن توركيا تۆپبارانا هەرێمێ بكەت. هەتا نهو بەس هاولاتيێن ئاسايى ٦٧ كەس شەهيد بووينه. هيڤيدارين دڤی بارودۆخێ هەستيار دا هەمى حزب و لايەنێن سياسی ببنه ئێك دەست، ژبەرکو بچيكترين خەلەتى مەزنترين دەست كەفته بۆ دوژمنێ مه. دوژمنێن مه دزۆرن تنێ ئێكگرتن و ئێكرێزى و ئێكگوتارا سياسی دێ بنه پالنەر بۆ گەهشتنا هەر ئارمانجەكێ.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)