ل ھەرێما كوردستانێ و ژبلی جھێن دی یێن دونیایێ، حكومەتا مە (حزب) شانازیێ ب ھەڤوەڵاتیان دكەن و گونەھ و شاشیێن خۆ دكەنە ستوویێ وان. چونكو ئەو مژیلێ ركەبەرییا پایەیێن خۆ یێن كەسایەتی و حزبینە، ئەو ژی زۆر جاران مە دیتیە كو كەسەكی نەشارەزایی و نەمال ھەیە، لێ پشتی پایەكا حكومی بدەستكەفتی یێ دەوڵەمەندبووی و بازرگانیێ ب وی مالی دكەت ئەوێ ژ وێ پلەیا بدەست وی كەفتی وەردگریت و خزمەتگۆزاریێن ھەڤوەڵاتیان پشتگوھێ خۆڤە دھاڤێژیت. ژ ئەگەرێ وێ چەندێ ژیارا ھەڤوەڵاتیان گەلەك پاشكەفتیە و ئەو بەرپرسێن خۆ ل سەر حسبا ھەڤوەڵاتیان دەوڵەمەندكری دبێژن ئەگەر ئەو نەبان كەسێ ئەو (ھەڤوەڵاتی) ژ تیرۆرێ نەدپاراستن وەك رژێما بەعس و داعشێ و…. ئەڤە ژی نەراستە، چونكو پشتی سەرھلدانا ساڵا (1991) سووپایێ عیراقێ بەرەڤ كوردستانێ ھات و ئەو بەرپرسێن من ئاماژە پێكری بەری ھەمیان رەڤین بێ شەڕ و ئەڤ چەندە بۆ ئەگەرێ كۆچبەریا ھەڤوەڵاتیێن كوردستانێ بۆ توركیا و ئیرانێ. ھەر ب ھەمان شێوە دەمێ داعشێ گەف ل سنوورێن كوردستانێ كرین، وان بەرێرسان بەرۆكێن شەڕی ھێلان و بەرەڤ بەرۆكێن پشتێ پاشڤەچوون. ئەڤەژی بۆ ئەگەرێ ھندێ كو ھەڤوەڵاتی بەرەڤ گوندان برەڤن. ھەروەسا ل روودانێن (16) ئۆكتۆبەرێ ھەر حزبەكێ یا دی تاوانباركر ب خیانەنتكاریێ و بەرەڤ ھێلێن پاشیێ چوون. ئەڤە ھەموو و زێدەتر كارێ وان بەرپرسانە، لێ ئەو گونەھێن خۆ دكەنە ستوویێ ھەڤوەڵاتیان دەمێ ھەڤوەڵاتی داخازا مافێن خۆیێن خزمەتگۆزاری دكەت ب مەرەما بێدەنكگرنا وی.
سەرەرای ڤێ چەندێ ھەڤوەڵاتیێ مە ژی ئەڤرۆكە یێ نڤستییە و نزانیت چ چێدبیت ل ھەرێمێ. بۆ نموونە دەمێ سەرۆكێ حكومەتێ یێ نوو گۆتی من حكومەتەكا قەردار وەرگرتیە، ھەڤوەڵاتیێ نڤستی نەزانی كو ئەو قەر دبیتە (21) ملیار و ( 675) ھزار دوڵارێن كۆمپانیێن گازێ دەمێ گاز فرۆتی نەكری، ئەگەر ئەم ڤی كۆژمەی دابەشبكەین ل سەر ھژمارا ھەڤەڤوەڵاتیێن ھەرێما كوردستانێ كو ھژمارا وان (5) ملیۆن و (200) ھزار كەسن، دێ ھەر ھەڤوەڵاتیەك قەردار ب (4200) دۆلاران بیت. ئەرێ ھەڤوەڵاتی دزانیت زێدەباری قەرێن مووچەیان و بەڵیندەران و جوتیاران، ئەو مالێ وان بەرپرسان ل ساڵێن بەرێ پیچكری تێرا ئاڤاكرنا دوو كوردستانا بوو؟ لێ نوكە وان بەرپرسان ھەڤوەڵاتی قەردار كریە و گونەھێن خۆ كرینە ستوویێ وی؟ وەك بەڵگە ل سەر ڤێ چەندێ، پارێزگارێ دھۆكێ د چاڤپێكەفتنەكێدا دبێژیت چەند كەس ئاستەنگبوون درێیا ئەنجامدانا خزمەتگۆزاریان ل دھۆكێ. ھەروەسا سەرۆكێ جڤاتا پارێزگەھا دھۆكێ دبێژیت، گەلەك غەدر ل دھۆك ھاتییە كرن، ئەژی دبێژم ھوون دزانن ئەو كینە زیانێ ل دھۆكێ دكەن لێ ھوون وان دپارێزن و ئاشكەرا ناكەن و ھوون و ئەو شانازیێ ب ھەڤوەڵاتیان دكەن و گونەھێن خۆ دكەنە ستوویێ وان.