ئاماژه‌یێن ڤان رۆژان یێن بۆ وێ ئێكێ دچن، هه‌روه‌كو دووماهیا تۆنێلا ره‌شه یا ب سه‌ر مه داهی. ئه‌ڤه چه‌ندین ساله و ب تایبه‌ت ژی ئه‌ڤ هه‌ر پێنچ سالێن بۆرین هند ددژوار بوون، ل سه‌ر هه‌رێما كوردستانێ و هه‌ر كورده‌كی ژی، ب گه‌ل و ده‌ستهه‌لات ڤه. یا دیار و پێشچاڤ بوو، ئه‌و ئاریشه یێن بۆمه هاتین ژ لایێ هنده‌ك وه‌لاتێن خێر بۆ ڤێ پارچا ئه‌ردی و خه‌لكێ وێ نه‌ڤیایی، ئه‌ڤرۆ ژی و پشتی كو سه‌رۆكێ نوو یێ هه‌رێما كوردستانێ نێچیرڤان بارزانی ده‌ستێ وی گه‌هشتیه پۆستێ سه‌رۆكاتیێ ب ره‌نگه‌كێ فه‌رمی و شه‌رعی، هه‌ر ده‌م ل ده‌ست قه‌ستا وان نه‌خشه‌ریێان كر یێن تنێ د سه‌رێ وی دا، بۆ سه‌رخستن و مه‌زنكرنا ئه‌زموونا هه‌رێما كوردستانێ، پشتی پیچه‌كێ عه‌ورێن ره‌ش و تاری هاتیه ڤه‌دان!! ئێكسه‌ر و پشتی رێككارا ئێكی كو ئه‌و ژی سه‌ره‌دانا به‌غدا كری، پێنگاڤه‌كا عه‌قلانه بوو، مینا زه‌مینه‌خۆشكرنه‌ك بۆ هندێ ده‌لیڤه‌یا تۆماركرنا ئێكه‌م ئارمانجێ، ئه‌و ژی ڤه‌كێشانا ئه‌مریكا یا مه‌زن بۆ ناڤا ڤێ ده‌ڤه‌را ئالۆز یا كه‌س ب ساناهی نه‌شێت ژێ قورتال ببیت. نه‌مازه هه‌رێمه‌كا وه‌كو مه پری نه‌حه‌ز و پیلانگیر ل به‌ر راوه‌ستای ژ بلی ئه‌مریكا گه‌ور نه‌بیت، كی دێ كاریت مه ژ ناڤ هه‌ڤسه‌نگیێ ئینیته ده‌ر.
ئه‌ڤجا راسته ئه‌ڤه پرۆتۆكۆله‌كێ بازرگانی یه، به‌لێ ب دیتنا من و من به‌ری نوكه ژی دگۆتاره‌كا خوه دا دیاركربوو كو مه‌ره‌م و ده‌سكه‌فتێن سیاسینه بۆ به‌رژه‌وه‌ندیا هه‌رێما كوردستانێ و دابینكرنا پاشه‌رۆژا وێ. هه‌لبه‌ت ئه‌و خالێن سست یێن هه‌می لایه‌نێن هه‌ڤدوژ و ب بهێجه‌ت ل سه‌ر كوردستانێ و ئه‌زموونا وێ هه‌رده‌م به‌غدا دكه‌ته ئه‌گه‌ر و رێیا جێبه‌جێكرنا هه‌می پلانێن خوه، كو دربێ خوه ل هه‌ولێر بده‌ن. به‌لێ نها سه‌رۆكێ هه‌رێمێ ژ زێده‌بوونا سه‌رۆبۆرێن وی یێن زۆر ل گه‌ل ڤان لایه‌نان هه‌میان و یا ب سه‌رێ مه ئیناین، گه‌هشتیه وێ زانینا كانێ چاوان هه‌موو لایه‌ن هزر دكه‌ن و چ دادرێژن بۆ ئه‌زموونا مه یا ئه‌و دبینن مه‌ترسیدار ژ به‌ر حه‌سوودیێ ل سه‌ر مال و سامان و خێراتێن كوردستانێ. له‌ورا ژی دگۆتارا خوه یا دووهیێ دا داكۆكی ل به‌غدا دكر كو دێ هه‌موو ئاریشه‌یێن هه‌لاویستی هێنه چاره‌سه‌ركرن و شاشیێن به‌رێ ببنه جهێ مفادیتنێ. هه‌لبه‌ت هه‌می دزانن ئه‌م وه‌كو گه‌له‌كێ سته‌ملێكری چو شاشی نه‌كرینه، به‌لێ هه‌ما بۆ گرتنا ده‌ڤ و هزرێن لایه‌نێن ل مه ب هه‌جه‌ت.
ئه‌ڤه ژ لایه‌كێ سیاسی ڤه، وه‌كو دی ژ لایه‌نێ ئه‌منی ڤه ژی هه‌كه ژوورا بازرگانی یا ئه‌مریكی هاته ڤه‌به‌رهێنانێ ل هه‌رێما كوردستانێ، سوبه‌هی چو ئاریشه و هێرشێن تیرۆری ژی یێن مینا رێکخراوا داعش رووناده‌نه‌ڤه، ئه‌مریكا دێ ب هێزا خوه به‌ره‌ڤانیێ كه‌ت، و هه‌ر وه‌سا ژی ناهێلیت چو ده‌وله‌تێن دیتر به‌رژه‌وه‌ندیێن خوه ل هه‌رێمی بسه‌پینن و هیلالێن خوه یێن مه‌زهبگه‌ری به‌رفره‌ه بكه‌ن و كوردان بهۆژینن. ژ لایه‌كێ دی ڤه ژی ئه‌ڤه په‌یوه‌ندیا خورت په‌یامه‌كا سه‌ربازی یه بۆ ئیرانێ و توركیا كو كورد دێ جهێ هه‌ڤپه‌یمانێ ئه‌مریكا گریت. و ئێدی گه‌ف و مه‌ترسی ل سه‌ر مه دێ كێم بن و خوه زۆرداریێن ل ماده‌یێن دستووی ژی دێ ئه‌مریكا رۆلێ دادوه‌ری و چاڤدێری ئینیت، و بۆ هه‌میان دیار بیت كا خه‌له‌ل ژ كیڤه‌یه و كی یه بێبه‌ختیێ ل كوردان دكه‌ت؟!
(گووتار دەبڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)