دەڤەرداریا ئامێدیێ کو ژلایێ رووبەریڤە ب مەزنترین دەڤەرداریا عیراقێ دهێتە هەژمارتن، ژلایێ گەشتیاریڤە پترین جهێن گەشتیاری یێن هەرێمێ دکەڤنە سنوورێ ڤێ دەڤەرداریێ، ژلایێ شینواریڤە دەرگەهێ بەهدینان و زانینگەها قوبەهان و مزگەفتا مەزنا ئامێدیێ… هتد، دیدەڤانێن کەڤناری و رەسەنییا ڤی جهینە، ژلایێ کەرتێ چاندنێ ژیڤه (سماق، کونجی، تویتن، برنج،…هتد) یێن سنوورێ ڤێ دەڤەرداریێ ناڤودەنگێن وان سنۆر دەربازکرینە. لێ یا جهێ داخێ د نوکەدا پترین دەڤەرێن سەر ب ڤێ دەڤەرداریێڤە ژبەر بۆردوومانکرنێن فرۆکەیێن شەڕکەر یێن تورکیا ژیان لێ نەمایە یانژی ل بن هەڕەشەیا چۆلکرنێ نە. هەر ژبەر ڤان بۆردوومانێن نیمچە رۆژانە پترین جهێن گەشتیاری بووینە جهێن قەدەغەکری، پترین زەڤیێن چاندنێ ماینە بەیار، چەندین گوند ب کاڤلکری ماینە و خەلکێ وان گوندان نەشێن ڤەگەڕنە سەر گوندێن باب و کالێن خوە. ئەو گوندێن ژیان لێ بەردەوام ژی نەشێن ژ چارچۆڤەیێ گوندی، ئانکو ئاڤەدانیێ دووربکەڤن ب تایبەت ب شەڤ. مینا سەردەمێ سەدامێ دکتاتۆر خەلکێ ڤان گوندان ل ژێر مەترسیێ یە.
نها کو دەمساڵ بوهارە و جۆرەها جۆرێن گیایان ل چیا، گرو بانێن سنوورێ ڤێ دەڤەرداریێ شین بووینە و د بەرێ دا ئەڤ گوندە هەم بۆ خوارنێ هەم ژی بۆ فرۆتنێ ژ گیایێ بوهارێ سوودمەند دبوون. لێ نها نکارن سەرا ئاقارێن گوندێن خوە بدەن و ب مەبەستا کۆمکرنا گژوگیایان یان ب سەربرنا دەمەکێ خۆش و ئارام ل واران بمینن!. ئەگەر بچن ژی وەکی ئاخڤتنا کولانکی دبێژن: “خوینا وی ل سەر دایک و بابێن وی یە و یێ چوو ژ کیستێ خوە چوو). لەورا بێزارییەکا مەزن ل چەم خەلکێ ڤێ دەڤەرێ دروست بوویە و “کێر گەهشتییە سەر هەستی”. لێ هیچ تشتەک ژ دەستێ وان ناهێت ژبلی کو گازیێن خوە بگەهیننە جهێن شۆلەژێ و گازیێن خوە بۆ چوار جهان بلند دکەن. ژ تورکیا دخوازن ئێدی ب چ رەنگان ب بەهانەیا هەبوونا بنگەهـ و بارەگایێن پەکەکێ چیا و ئاقارێن وان بۆردوومان نەکەن. ژ پەکەکێ ژی دخوازن شەڕێ خوە ببەنە د ناڤ ئاخا تورکیادا و نەبنە بهانە بۆ تورکیا کو ب شێوەیەکێ هەڕەمکی و فاشیزمانە خەلکێ سڤیل بکەنە قوربانی بۆمبەبارانکرنێن خوە. ژ حکوومەتا هەرێمێ ژی دخوازن سنوورەکی بۆ ڤان پێشێڵکاریێن هەمی ئاین، یاسا و قیەمێن مرۆڤایەتی بەزاندین، بدانن و ئەگەر ب تنێ نەشێن تورکیا رابوەستینن، بلا گڤاشتنێ ل سەر حکوومەتا ناڤەندی بکەن. ژبەرکو گەلەک جاران سەردەستێن عیراقێ باس ل سەروەری و ئێکپارچەییا عیراقێ دکەن، ئێدێ بلا بفەرموون ڤان هێرشێن هۆڤانە رابوەستینن و ئێدی خەلکێ ڤێ دەڤەرێ و تەڤایا دەڤەرێن دی یێن مینا دەڤەرا ئامێدیێ ژ ڤێ قوربانیدان و ترس و نەئارامیێ بهێنە قۆرتالکرن و پاراستن.
- نوونەرێ رۆژئارتیکڵ ل ئامێدی.