زۆربەيا لايەنێن سياسی یێن هەرێما کوردستانێ مینبەرێن مزگەفتان کرینە جهێ گەهاندنا پەیام، پلان و پرۆژە و پەیرەوێن خۆ یێن سیاسی بۆ خەلکی. ڤێ چەندێ ژی باوەریا خەلکی ب حورمەت و پیرۆزییا مزگەفتان و ئایینێ ئیسلامێ ژی کێم کرییە. وەکی ئەم دبینین و تێبینی دکەین ل ڤان دەمان زۆربەیا گووتاربێژ و مەلایێن مزگەفتان ژ ناڤەرۆکا کارێ خۆ دەرکەتینە و ئێدی گەهاندنا پەیاما پیرۆزا ئایینێ ئیسلامێ دگووتارێن واندا گەلەک کێم بوویە. ئاراستەیا پتریا پەیام و گووتارێن وان گرێدای سیاسەتێ و رۆژەڤا رۆژانە و کار و بزاڤ و چالاکیێن پارتێن سیاسی یێن کوردستانێ یە.
ئەڤە ددەمەکیدایە کو مرۆڤ و جڤاکێ موسلمانان نوکە ژ هەر وەختەکێ دی پتر پێتڤی ب ئاگەهداربوون و وەرگرتنا زانیارییانە ل سەر رەوشت و تیتالێن ئیسلامێ یێن پیرۆز و ب تایبەتی تەخا گەنجان ژ کور و کچان. ژبەر کو وەک ئەم هەمی دزانین شاشیێن ئایینی مرۆڤی تووشی سەردابرن و گونەهان دکەن، نەک شاشیێن سیاسی یێن گرێدای هندەك لایەنێن سیاسی و ژیانا کورت یا ڤێ دنیایێ. لەوما پێدڤییە ئەڤ رەوشە نەمینیت و حورمەت و پیرۆزییا مزگەفت و جهێن پەرستنێ بزڤریتەڤە. ب تایبەتی دڤێت گووتارێن مامۆستایێن ئایینی ژ چارچۆڤێ ئایینی دەرنەکەڤن و بۆ وێ یەکێ بن کو رێکا راست و کارێ باش نیشا خەلکی بدەن و هاندەربن بۆ خورتکرنا پێکڤەژیانا دناڤبەرا هەمی پێکهاتەیێن وەڵاتی.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)