بەری ساڵا (1991)ێ كاودانێن ئابووری، زانستی و تەندروستی ل باكوورێ عیراقێ گەلەك باشبوون. ھەڤوەڵاتیێ كورد ژ خوارنا خۆیا رۆژانە نەدترسیا یان ژ مووچەیێ خۆیێ رۆژانە یان ژ وان باجەیێن ل سەر. چونكو ئەو ھەموو دھاتنە رێكخستن ب قانوونان. كاودانێن فێركرنێ ركابەری دگەل ئاستنێ فێركرنا فرەنسی دكر، نەھێلانا نەخویندەواریێ دكر تا نەھێلای. قۆتابخانەیێن باش و پاقژ ھەبوون، پەرتووك و پەڕاو ھەبوون، كادرێ فێركرنێ ل ئاستەكێ بلندێ زانست و رێزگرتنێ بوو. كاودانێن تەندروستی یێن باشبوون، نەخۆشخانە، دەرمان و خزمەتگوزاریێن تەندروستی ھەبوون، ل ھەموو پارێزگەھان كۆنترۆلا جۆری ل سەر نەخۆشخانان ھەبوون، خزمەتگۆزاریێن حكومی (24) دەمژمێران وەك ئاڤ، كارەب، گاز، پەنزین و كەلوپەل ل دووڤ ماركێن جیھانی ھەبوون و ئەرزان بوون.
لێ پشتی ئەو حكومەت لاوازبووی د شەڕێ كوێتێدا و سەرھلدانا ھەڤوەڵاتیێن كورد ل باكوورێ عیراقێ ل ساڵا (1991)ێ روویدای، پارتێن كوردی ئەوێن ل ساڵا (1975)ێ شكەستین و رەڤینە ئیرانێ، ژ ئیرانێ ھاتنە د باكووریدا بێ شەڕ و ب ترۆمبێلێن كەڤن و جلوبەرگێن دڕیای. مللەتێ كورد بەرھەمێ سەرھلدانا خۆ پێشكێشی وان پارتان كر ل سەر تەبەقەكا زێری. ئەڤ چەندە بوو ئەگەر كو كاودانێن باش یێن بەری ساڵا (1991)ێ ھەموو خراببن. پشتی ساڵا(1991)ێ باكوورێ عێراقێ ل سەر دەستێ وان پارتان، بوو ھەرێما باكووێ عیراقێ یان ھەرێما كوردستانێ. ھەڤوەڵاتی ژ خوارنا خۆ یا رۆژانە و موچێ خۆ ترسیا و برسیبوو، كاودانێن خزمەتگۆزاریێن حكومی بوونە كاودانێن بازرگانكرنێ ب ژیانا ھەڤوەڵاتیان ددەستێ وان پارتاندا. ئەڤ پارتە خزمەتگۆزاریێن حكومی وەك ئاڤ، كارەب، غاز، گاز و…ھتد دفرۆشنە ھەڤوەڵاتان ب ھێجەتا قەیرانێ و نەبوونێ. ئەڤ چەندەژی بۆ ئەگەرێ زەنگینبوونا وان پارتان ل سەر فەقیربوونا ھەڤوەڵاتیان. ئەڤ پارتە بوونە خودان بارەگا، قەسر، ڤیللە، كیلگە، كومپانی و مال ل بنووكان ل دەرڤەی وەڵاتی. ژیانا ھەڤوەڵاتی ژی كریە خشخشۆك ل دووڤ خشتەیێ مووچەی، خشتەیێ كارەبا حكومی و یا موەلیدان و …ھتد.
ئەڤە ھەموو ھاتە سەرێ ھەڤوەڵاتی ب ھێجەتا كو ئەوان پارتان گۆتی دێ دەولەتا كوردستانێ دامەزینین و ھندەك دروشمێن كارتۆنی بڵاڤكرن دا بەردەوام بن ب حوكمێ خۆ كو گەھشتیە دكتاتۆریەتێ. ھەر كەسك ژ ھەڤوەڵاتی، رۆژنامەڤان و چالاكڤانێن مەدەنی ژی پەیڤەكێ بێژیت دەربارێ مافێ مرۆڤان و بەرەڤانیێ ژ ئازادیێ و دیموكراتیێ، دێ ئەو پارت ل بەر سنگێ وی راوەستن و وی ژ ناڤبەن. باوەربكەن پیساتیا وان پارتان گەھشتیە وێ رادەی كو قۆتابخانە و نەخۆشخانەیێن حكومی ژ ناڤ ببەن، دا ھەڤەوەڵاتیان نەزان بكەن و ببنە خزمەتكارێن وان پارتان ل سەنگەرێن شەڕان. ھەروەسا بەشەك ژ ھەڤوەڵاتیێن زەنگین زارۆیێن خۆ فرێكەنە قۆتابخانە و نەخۆشخانەیێن ئەھلی یێن بەرپرسێن وان پارتان ئاڤاكرین ب مالێ گەندەڵیێ. ب مخابنیەكا مەزنڤە، نھا ئەڤ پارتە ھەموو خزمەتگۆزاریێن حكومی دفرۆشنە ھەڤوەڵاتیان و بازرگانیێ ب ژیارا وان دكەن و دكتاتۆریەتێ بكار دئینن. پرسیارا گرنگ ئەوە ئەگەر ھەڤوەڵاتیێن كورد ل ساڵا (1991)ێ زانیبا كو ئەڤ پارتە دێ بازرگانیێ ب ژیارا وان، پاشەرۆژا وان و زارۆیێن وان كەن دا سەرھلدانێ كەن؟! ب دیتنا من سەرھلدان نەدكر، لێ ئەو ھەڤوەڵاتی یێ پەشێمانە، ترسنۆكە و نەوێریت پەشێمانیا خۆ ژی ئاشكەراكەت.