بهری بچمه دناڤ بابهتی دا دێ چهند پرسیارهكا كهم ئهرێ پێشكهفتنا مه ب جلكێ مهیه و نه ب مێشكێ مەیە؟ ئهرێ ئهو كچێن حیجاب لبهر خۆ كری مێشكێ خۆ ڤهشارتیه و نه پرچا خۆ؟ ئهرێ ئهوێن پهنتهرۆن و جلكێن كورت دكهنێ ئهو پێشكهفتینه و بهروڤاژیێن وان پاشكهفتینه؟ ئهگهر بهرسڤا ته بۆ ئێك پسیار ژی (بهلێ)بیت! هیڤییه زێدهتر نهخوینه، ژبهركو ئهڤ نڤیسینه نه بۆ تهیه! بهلكو بۆ كهسێن خودان هزرێن نوی یه و یێن دروست هزردكهن. ب لێبۆرینڤه ل زۆربهیا كهنالێن مه یێن راگههاندنێ بەرسڤا ڤان پرسیارێن من كرین (بهلێ)یه. ئانكو ئهو هزردكهن پێشكهفتن ب جلكێ مرۆڤییه ئهو هزردكهن ئهو كچێن حیجابێ دكهنێ مێشكێ خۆ یێ ڤهشارتی و نه پرچا خۆ. ئهو هزردكهن ب تنێ یێن پهنتهرۆن و جلكێن كورت لبهر خۆ دكهن پێشكهفتینە.
بهری دهمهكی من سیڤیێ خۆ بۆ رێڤهبهرێ كهنالهكی فرێكر وهك پێشكێشكار بهێمه وهرگرتن یان ههر كارهكێ دی بیت. پشتی سیڤی یێ من دیتی رازی بوو كو ههر دهما پێدڤی كهسهكێ بن بێژییته من. ل دوماهیكێ من پرسیار ژێ كر ئهرێ هوین كچێن ب حیجاب وهردگرن؟ بهرسڤ دا و گووت نهخێر یێن ب حیجاب ناوهرگرین ئهڤه گهلهك ژی هاتن و مه وهرنهگرتن! من گووتێ كهنالێ تهیێ خۆ بهرچاڤكرنێ (عرض) یه؟ زیرهكی مهرجه یان جلوبهرگ؟ بهرسف نهدا و ما بێدهنگ, پاشی گووت ئهڤه یاسایا كهنالی یه. من دڤێت بزانم ئهرێ كێ ئهو یاسایه دانایه؟! ماخۆ ئهو یاسا ژ ههسارهكا دی نههاتیه!.؟ بهری چهند رۆژهكێن كێم ژی چوومه ههڤدیتنێ (موقابهلێ) ل كهنالهكی (وهكی ئهو خۆ پێشكهفتی دبینن). دهمێ چوویمه ژوور من هزركر دێ من كهنه رێڤهبهرا كهنالی نهكو پهیامنێر حهفت كهس دژوورڤه بوون بۆ (موقابهلێ). رێڤهبهرێ گشتی یێ كهنالی گووت مه چ كار دگهل جلوبهرگ و حیجابێ نینه بتنێ مهرجێ مه زیرهكیه. من گووتێ ئهگهر جلوبهرگ و حیجاب مهرج نهبن ههمی تشتێن دی بساناهی نه و من باوهریا ب خۆ ههی. پشتی ژ ههڤدیتن و تێستێ دهرچوویم ژسهرجهمێ بهژداربوویێن دی ئهز هاتمه وهرگرتن ل دوماهیك رۆژ كو دا دهست بكاری كهم، گووته من دڤێت تۆ پهنتهرۆنی ل بهر خۆ بكهی. من گووتێ ئهڤه مهرج نهبوو وه بهری نوكه گووت مه چ كار ب جلوبهرگان نینه. بهلێ ب مخابنیڤه كره مهرج و ل سهر ئاخفتنا خۆ نهمان. ئهز ژی رازی نهبووم ونهچوومه كاری.
ئهرێ بۆچی راگههاندنا مه دێ هند سڤك بیت كو ب تنێ زیرهكی و جوانی د جلوبهرگان دا ببین؟! ئهرێ ئهڤه مێشكێ كهسێن خودان زانینه یان بهروڤاژی؟ ئهگهر جوانی د خۆ بێ ستارهكرنێ دا بایه دا (مهمینك) جوانترین گیانهوهربیت! ئهگهر پێشكهفتن د جلكێن كورت و بێ جلكیێ دابایه دا مروڤێ (نیاندرتال) پێشكهفتیترین مرۆڤ بن! هیڤییه ئهو كهسێن راگههاندنا كوردی برێڤه ببهن پیچهك مێشكێن خۆ بهرفرهكهن و مهزنتر هزبكهن. راگههندنا مه هند یا ژ سنورا دهركهتی یا ژبیركری كا بنیاتێ وان كی بوون باب و باپیرێن وان چاوابوون. (بلا بهس بیت ئاقلێ مرۆڤێن نیاندرتال).
· مامۆستا
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)