کەسێن خودان پێداویستیێن تایبەت و خودان نەخۆشیێن درێژخایەن (کورە، کەڕولال، یان نەخۆشیێن گران و …هتد)، هندەك جاران بێ بەهر دبن یانژی گیرودبن د پێکئینانا پرۆسێسا هەڤژینیێدا. واتە ژبەر وان نەخۆشییان دویر دکەڤن یان ئەو خۆ دویر دکەن ژ ڤێ پرۆسێسێ. هەڵبەت هندەك جاران ئەڤ کەسانە نەبتنێ بۆ خۆ، بەلکۆ بۆ مالباتێن خۆ ژى دبنە ئاریشە و ب راستى دبنە ئاریشە ل هەمبەر پرۆسێسا هەڤژینیێ، چونکى مخابن خۆ لاواز دبینن. لەوما ژیان دگەڵ کەسێن وەسا زۆر یا ب زەحمەتە و کێم کەس دشێن بڕیارا ئەنجامدانا ڤێ پرۆسێسێ دگەڵ کەسێن هۆسا ئەنجامبدەن. چونکى دڤێ پرۆسێسێدا بەرهەمەک هەیە کو ئەو ژى ژدایکبوونا زارۆکی یە و لێرەدا پێتڤى یە کو دایک و باب ئامادەییەکا باش بکەن بۆ خزمەتکرنا زارۆکان. کەسانێن خودان پێدڤیێن تایبەت دڤێت دووقات خۆ زەحمەت بدەن دا ب ڤى ئەرکى راببن ب باشى. نابیت ئەڤ نەخۆشییە یان تایبەتمەندییە ببیتە ئەگەر کو خۆ لاواز ببینن و بترسن ژ پێکئینانا پرۆسێسا هەڤژینیێ تەنانەت دگەڵ کەسێن نە ژ خودان پێداویستیێن تایبەت ژی.
هەروەسا ئەگەر گیروبوون ژی دپێکئینانا ڤی پرۆسێسێدا، رامانا وێ ئەو نینە کو دونیا خلاس بوو. نابیت ئەو بێ ئۆمێد بن ژ ئارەزویا خۆ بۆ ژیانێ. بەلکو دێ شێن مژویلى کار و بوارێن دیتر بن بۆ باشتر ئاڤاکرنا خۆ ژ هەمی لایەنانڤە. ب ڤێ رێکێ شانسێ پێکئینانا هەڤژینیێ و ژیانەکا خۆش دێ پتر هەبیت و ژ گەلەک کەسێن تەندروست بەختەوەرتر بژین. گەلەک کەسێن کورە یان کەڕ و لال خۆدیێن تایبەتمەندى و پسپۆریێن باشن کو ب کەسەکێ تەندروست ناهێتە ئەنجامدان. ئەو کەسانە بووینە نموونەیا کەسێن بەهرەمەند. ئەڤ چەندە نە تنێ گرێدای وان کەسان ب تنێ یە، بەلکو ب مال و کەسوکارانڤە ژی گرێدایە کو پێویستە وان هانبدەن بۆ خۆ ئاڤاکرن و بەردەوامیدان ب ژیانێ وەکو هەر مرۆڤەکی. واتە دڤێت کەسێن هۆسا چ جاران بێ هێڤى نەبن و بزانن کو هەمی گاڤا کلیل هەنە بۆ ڤەکرنا دەرگەهێن جودا بۆ چارەسەرکرنا هەمی ئاریشەیێن ژیانێ.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ).