کوردستان د بوارێن جۆرا و جۆردا رۆژ بۆ رۆژێ یا پێشدکەڤیت و یا دبیتە کۆپیا هندەک وەلاتان. لێ ئەز دبێژم هەر تشتەک د دەمێ خۆدا باش و جوانە. نها ئەم پێتڤى ب شاهجوانێن کوردستانێ نینین کو حوکمەتا هەرێما کوردستانێ رابیت ب دانانا ڤان جۆرە فیستەڤالا. نها کوردستان پێتڤى ب پێدڤیێن رۆژانە یە کو دڤێـت حوکمەت پێداویستیێن رۆژانە یێن خەلکى دابین بکەت و ژیانا خەلکى خۆش بکەت. نەکو راببیت ب گێرانا فێستیڤالا و هەلبژارتنان جوانترین کچ. خەلکێ مە پێتڤى ب ژیانەکا خۆشە. ئەڤى خەلکى زۆر زەحمەت، نەخۆشى، ئێش و دەردەسەرى دیتینە. ئەو کۆژمێ پارەی یێ ل فیستەڤالا شاهجوانا کوردستانێ هاتییە مەزاختن کو (40) دەفتەرێن دۆلارینە. ئەگەر ئەو کۆژمێ پارەی ل ژیانا خەلکى دابانە، ئەز باوەرم دا گەلەک ژیانا خەلکى باشتر بیت ژ یا نها. لێ ب مخابنى ڤە!
رەخنێ ل شاهجوانا کوردستانێ نەگرن و بەحسێ وێ نەکەن، بەلکو رەخنێ ل حوکمەتێ بگرن. چونکى ئەگەر دەستهەلاتێ ئەڤ کارە نەکربا و ئەڤ جۆرە فیستەڤالە نە دانابان، چ کچ بەشدارنەدبوون، چ کچ نەدهاتنە هەلبژارتن و ئەڤ پارێ مەزن ژى نەدهاتە مەزاختن. لێ حوکمەتێ ئەڤ جۆرە فیستەڤالە دڤێن و ژیانا خەلکى پشتگوه هاڤێتیە. بو کارێن کرێت و کارێن بێ مفا پارە هەنە و کوردستان یا زەنگینە بۆ ڤان جۆرە فیستەڤالا. لێ پارە نینن بۆ خزمەتا خەلکى، مووچەى، دابینکرنا کارەب، ئاڤ، نەفت، خزمەتا گەنجا و پرۆژێن جوان بۆ هەمی خەلکێ کوردستانێ ب گشتى. دڤێـت حوکمەت خزمەتا خەلکى ب دانیتە پێشیا هەر تشتەکێ و خزمەتا وان بکەت و ئەگەر خزمەتا وان ب شێوەکێ مەزن و بەرچاڤ هاتە کرن، ئەم رێگریێ لێ ناکەین و رەخنێ ژى لێ ناگرین بلا ڤان جۆرە فیستەڤالا ژى بدانن. لێ نوکە و دڤان کاوداناندا خزمەتا خەلکى گرنکترە ژ هەلبژارتنا شاهجوانا کوردستانێ.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)