دڤێ گووتارێ دا من دڤێت بەحسا دوو خالێن گرنگ یێن جیھانا خۆبەخشان و خۆبەخشیێ کەم. ئێک ژ وان خالان ئەوە کو نوکە مە ھژمارەکا کێم یا خۆبەخشان ھەیە. ئەڤ ھژمارە ژی بەردەوام د داکەفتنێ دایە. ئەڤە ژی بوویە ئەگەر کو گەلەک ب کێمی ھاریکاری بگەھن جھێن پێدڤی. هۆکارێ ڤێ یەکێ ژی ب باوەرییا من ڤەدگەریت بۆ خرابیا بارودۆخێن ئابوری و مادی کو ھەر کەسەک نھا ل دەلیڤێن کاری دگەرن دا ژیانا خۆ پێ برێڤەدبەن و لبەرامبەر ھندێ پارەیەکی وەربگرن. ئانکو گەلەک ژ خەلکی دەلیڤا ھندێ نینە کارێ خۆبەخشی بکەن. ژخوە ئەگەر بکەن ژی بەردەوام نابن، ھەروەکی من ئاماژە پێ دای کو ئەگەر پتر بۆ لایەنێ مادی دزڤریت کو گەلەک یێ لاوازە. ھەروەسا پشتەڤانیا خۆبەخشان ژلایێ دەستھەلاتێ و خودان بەریکان ژی ناھێت کرن. ڤان هۆکاران وەکرییە کو خۆبەخش کێمبن و ئەگەر ھەبن ژی ھند بۆ ھاریکاریێ کارناکەن ھندی بۆ ریکلامکرن و خۆ دەرخاندنێ کاردکەن.
ل ڤێرە من دڤێت ئاماژە ب نموونە رەفتارەکێ بکەم کو من ب چاڤێن خۆ دیتییە و خۆبەخشێن مە ل سەر دچن. بەری چەندەکێ ئەز و چەند ھەڤالەک رابووین ب دروستکرنا گرووپەکێ خۆبەخش. مە ڤیا ئێکەم چالاکیا خۆ ل جھەکێ ھەستیار و پێدڤی ئەنجامبدەین. لێ ل دەمێ سوحبەتکرنا مە د گەل رێڤەبەریا وان، ئەو گەلەک د دلگران بوون ژ ھندەک خۆبەخشان. ئیک ژ فەرمانبەرێن وان کو ئافرەت بوو گوتی “ئەم حەزناکەین ھوون راگەھاندنێ ئاگەھدار بکەن و ھند وێنان بگرن. چونکو بەری نوکە گەلەک دھاتن دا تشتەک سادە کەن، لێ وێنە دگرتن و ل تۆڕێن جڤاکی د ئینان خار و بابەت گەلەک مەزن دکر و ئەم کێمدکرین.”
ل ڤێرە من دڤێت بێژم کو ئەز نە دژی ھندێ مە خۆبەخش چالاکیێن خۆ ب ئێکجاری بلاڤنەکەن. بەلێ بلا ب راستی و دروستی بلاڤبکەن. بلا نەبنە هۆکار کو زارۆک، کچ و ژنێن پێویست بگەهنە وی ئاستی کو ھەست ب نەبوون و کێماتیێ بکەن. ئەڤجا مخابن سەرەرای کو خۆبەخشێن مە دکێمن بەشەکێ ئەوێن ھەیی ژی ب کارێ خۆدیارکرن و ریکلامکرنێ رادبن.
- قوتابیا پەیمانگەها تەکنیکی بەشێ (ئای. تی)
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)
