ل پتريا وەلاتان گرنگى ب سيستەمێ هاژۆتنا تەكسيیان و شۆفێرێن تەكسيیان هەيە. کۆمپانی هەنە ب ڤی کاری رادبن ب پلان و رێکوپێکی. ب هەر شێوەيەكى ئاسانکارییان بۆ شۆفێران دکەن دا مافێن وان بەرزە نەبن. هەرچەندە گەلەک جاران شۆفێرێن تەکسییان ل وان وەڵاتان تاوان و كريارێن خراب ژی ئەنجام ددەن. لێ ل كوردستانێ ب مخابنیڤە زۆر ناڤێن نەجوان بۆ شۆفێرێن تەكسییان هاتينە دانان. ددەمەكيدا کو تا نوكە هیچ دەستدرێژى، كارێن دزى و كوشتن ژلایێ شۆفێرێن كوردڤە نەهاتينە كرن و، ئەگەر هەبن ژی رێژەیەکا کێمە.
مخابن تا نوكە ژلایێ دەستهەڵاتێڤە هيج کار و ياسايەك بۆ وان نەهاتيە دانان. بۆ نموونە بنگەهێن تايبەت بۆ نەهاتینە دانان، ژبلى هندەک كۆمەڵگەهێن تايبەت و نەخۆشخانەیان کو وان بنگەهێن خوە داناینە. هەروەسا ئاسانکاری بۆ نەهاتییە کرن بۆ وەرگرتنا پانزينى، ژبلى کو دەمەکی هاتە كرن لێ ب شێوەيەكێ دەمكى بوو. تا نوكە هيچ مافەكێ وان نەهاتيە پاراستن و هەر كەس و ل هەر تەمەنەکی مافێ هاژۆتنا تەكسیيان هەیە، هەرچەندە بڕيارەکا نوو دەرکەتییە كو فەرمانبەر و ئاسايشێ مافێ هاژۆتنا تەكسيیان نەبيت و بەروڤاژى ڤێ دێ دژى ياسایێ بيت. ژبەرکو مووچەیێ پترییا کارمەندێن ئاسايشێ دسەر مليۆن ديناران دایە. لێ یێ فەرمانبەران تا نوكە پاشكەوتە و مووچەیێ وان ناگەهيتە (٧٠٠،٠٠٠) هزاران.
ئەز دبێژم ئەڤ بڕيار، پلان و چارەسەرى دڤیا ب شێوەيەكێ دی با، تەمەن هاتبان دياركرن كو ژ ٢٥ ساڵی تا ٤٥ ساڵى مافى هاژوتنا تەكسیێ نەبيت. چونكە شۆفێرێ تەكسیێ بۆ خەلكەكى ب گشتى كار دكەت و كەسێن دسەر ٤٥ ساڵیێ دا ژلایێ دەروونى، شيان و سەرەدەریێ بۆ ڤى كارى نەگونجايە و دڤێت رێز لێ بێتە گرتن. هەروەسا بەريا دانا ڤێ بڕيارى پلانا پاشكەفتێ مووچەى هاتبا راستڤەكرن، دەليڤێن كارى د كەرتێ تايبەت و گشتى دا هاتبان دان، ئەو فەرمانبەرێن مووچەیێ وان تێرا ژيارا وان نەكرى كارەك بۆ هاتبا ديتن و بنگە بۆ شۆفێرێن تەكسيیان هاتبان چێكرن دا جادە ژى ژ وێ پەستانا زێدە كێم بن.. پلان پاشی بڕيار.
(گووتار دەربڕینا بۆچوونا نڤیسکارانە نەیا سایت و گووتارنامەیا رۆژئارتیکڵ)
