درۆژانێن فلمه فیسته‌ڤالا دهۆكێ دا وه‌ك رۆژنامه‌ڤانه‌كێ هونه‌ری به‌رهه‌ڤی پتریا رۆژان بووم بۆ ڤه‌گوهاستنا روودانێن هونه‌ری. هه‌ر ده‌سپێكا فلمه فیسته‌ڤالێ چاڤه‌رێی فلمێ (مین هه‌لگر)بووین وه‌ك بینه‌ره‌ك. رۆژا فلم ل هۆلێ هاتیه نیشادان، هێدی هێدی هۆلا كۆنگران تژی بوو و جه نه‌ما و گه‌له‌ك ژ پێرڤه مان. هه‌ر ل ده‌سپێكا دیمه‌نێن به‌لگه فلمی ژی، بینه‌ر گه‌له‌ك پێڤه هاته گرێدان. چونكو روودان گرێدایی ژیارا تاكه كه‌سه‌كێ كورد بوون و چ نواندن تێدا نه‌بوو. فلم هه‌موو به‌رهەمێ كامیره‌كێ بوو كو شه‌هید (فاخر) بۆ مالا خوه كڕی بوو. گه‌له‌ك روودانێن خێزانی ب وێ كامیرێ هاتبوونه تۆماركرن. ئه‌ڤان دیمه‌نان پتر دلێ مه هه‌ژارند و هێدی هێدی چاڤێن بینه‌ران ژی كزگریووك كه‌فتێ. شه‌هید (فاخر) نامێن گه‌له‌ك پیرۆز نیشادان.. كورده‌ك ژ كوردستانێ به‌ر ب مووسل بچیت و مینا هه‌لگریت بێی کو ئامیره‌كی بكاربینت، بێی کو بێژیت چ ئاین و نه‌ته‌وه ل ڤێرێ دژین. تنێ بۆ مرۆڤاتیێ مینان هه‌لگریت. ئه‌ڤه نه ب تنێ نامه‌ك بوو شه‌هید فاخر هه‌لدگریت، به‌لكو په‌یامه‌كه بۆ جیهانێ كو كورد هه‌لگرێن ڤێ په‌یامێ نه.
ل سالا 2003 پتر ژ 600 مینان راكرن، خه‌لكێ سڤیل و زارۆك قورتالكرن هه‌تا پێ خوه ژ ده‌ست دایی. ل شه‌ڕێ پێشمه‌رگێن كوردستانێ ل گه‌ل چه‌كدارێن داعش ژی، شه‌هید فاخر قه‌ستا ناف رێزێن پێشمه‌رگه‌ی كر، مین هه‌لگرتن و گه‌له‌ك پێشمه‌رگه ژ مرنێ قورتالكرن. هه‌تا هاتیه شه‌هیدكرن یێ به‌ردوام بوو ل سه‌ر خه‌باتا خوه بۆ مرۆڤاتی و نه‌ته‌وا خوه. محه‌مه‌د محسن وه‌ك هه‌ڤاله‌كێ شه‌هیدی دبێژیت: “شه‌هیدبوونا فاخر نه وه‌ك یا كه‌سه‌كی بوو، ژبەرکو وی گه‌له‌ك مرۆڤ ژ مرنێ قورتالكرن. ئانکو ڤی مرۆڤی ل ساخیا خوه ئه‌ڤ خه‌باته بۆ مرۆڤاتیێ و نه‌ته‌وا خوه دكر. پشتی وه‌غه‌را خوه ژی، بوویه په‌یامه‌ك و سومبله‌ك ل جیهانێ كو دبێژیت ئه‌م كورد ئه‌ڤه‌ینه و خودان په‌یامێن مرۆڤاتیێ نه. ب درێژاهی یا دیرۆكا مه ل گه‌ل عیراقێ، ئه‌وان ئه‌م كوشتینه و ته‌په‌سه‌ركرینه. ئه‌م یێ قورتالدكه‌ین ژ مینان!” پشتی ب دووماهی هاتنا فلمی، چاڤێن مه هه‌موویان تژی رووندك بوون. مه هه‌موویان سه‌نگا ڤی قاره‌مانی دیت. لێ غه‌مبار ژی بووین ژبەرکو دناڤا فلمی دا هاته دیاركرن كو هێشتا خێزانا وی كرێداره. هه‌تا خودانێ خانی ژی دهاته كرێیا خانی و كورێ وی گۆتێ تێله‌فونا بابێ من بكه، چه‌ند دیمه‌نه‌كێ ب ژانه؛ ل جهه‌كی مینان راكه‌ی و خه‌لكی ژ مرنێ قورتال بكه‌ی، ل به‌رامبه‌ر خودانێ خانی بێژیته ته كرێیا من.
تشتێ من دڤێت ل سه‌ر راوستم پشتی ئه‌ڤان دیمه‌نێن نه‌خوه‌ش و دووماهییا فلمی ب ده‌ستقوتان پێشوازی ل ستافێ فلمی هاته‌كرن. ب تایبه‌ت پشتی خێزانا وی به‌ر ب ده‌پێ شانوویێ چووی، بینه‌ر هه‌موو پێشڤه رابوون. گه‌نگه‌شێ ده‌ستپێكر و پتریا بۆچوونا ده‌ستخوشی بوون و فلم ژ هه‌ژی خه‌لاتی دیت. ده‌مێ پارێزگه‌رێ دهۆكێ خواستی پشكداری گه‌نگه‌شێ بیت، مه هه‌موویان كه‌یف پێ هات و مه هزركر دێ پارێزگه‌ر مزگینیا قورتالبوونا ڤێ خێزانێ ژ كرێداریێ راگه‌هینت. لێ ب تنێ ده‌ستخۆشی بوو و دیسا دیاركر كو ئه‌ڤه چیرۆكا ملله‌تێ كورده. یا ژمنڤە دڤیابا ئه‌ڤه گۆتنا هونه‌رمه‌نده‌كی، رۆژنامه‌ڤانه‌كی و ره‌وشه‌نبیره‌كی با. نە یا پارێزگه‌ری كو كه‌سێ ئێكێ یە، خودان ده‌ستهه‌لاتە و شیانێن هه‌ر تشته‌كی هه‌نه. دیسان ژی ئەز بێ ئۆمێد نه‌بووم و من هزر كر نه‌شیایە ڤی تشتی بكه‌ت، چنكو نابیت جوداهی دناڤبه‌را شه‌هیدان دا بهێته‌كرن. دبیت ب نێهنی ئه‌ڤ خێزانه بهێته قورتالكرن و هیڤیخازم ئه‌ڤ هزرا من راست بیت. چنكو ل دووڤ گۆتنا ده‌رهێنه‌رێ فلمی، هۆگر هرۆری ئه‌ڤه خه‌لاتێ یازدێ یه ئه‌ف فلمه وه‌ردگریت.
· رۆژنامەڤان
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)