“خرابترین وەزارەت”

سەرنڤیسکار

سەربوور، سەرهات، تاقیکرن و ئەزموون باشترین پیڤەرن بۆ هەر کەس و سازییەکێ کو پلان و بڕیارێن خوە ل گۆر وان ئاڤابکەن. ئەڤ چەندە ژی ل وەڵاتێن پێشکەفتی گەلەک ب گرنگی ل بەرچاڤ دهێتە وەرگرتن. لێ مخابن مرۆڤێ کورد و سازیێن کو مرۆڤێن کورد برێڤەدبەن، سوودێ ژ سەربوور و ئەزموونان وەرناگرن، یانژی پشتگوهدئێخن ددەما دانانا کارنامەیێن خوەدا. لەوما دبینین پتریا جاران تووشی ئالۆزییان دبن یانژی نەشێن کاروبارێن خوە ب باشی برێڤەببەن! نموونەیێن سەر ڤێ چەندێ ژی ل سەر ئاستێ مرۆڤ و سازییان دجڤاکێ مەدا گەلەکن. ل ڤێرە من دڤێت بەحسا ئەزموونا پتری چارێک سەدە یا وەزارەتەکا حکوومەتا کوردستانێ بکەم، کو چەند ساڵ دەربازدبن کار و پلانێن وێ ئالۆزتر و بێسەروبەرتر دیار دبن. هەروەسا کاریگەرییا خراب ژی ل سەر تاک و جڤاکی زێدەتر و خرابتر دبیت. ئەڤە ژی وێ یەکێ دسەلمینیت کو ڤێ وەزارەتێ هیچ سوود ژ ئەزموونا کارێ خوە یا ساڵێن دەربازبوویی وەرنەگرتییە، وەرناگریت و هەوڵ ژی نادەت یانژی ناخازیت ڤێ رەوشێ باشتر و رێکوپێکتر بکەت. لەوما بەرهەمێ وێ ژی هەر ل خرابیێ ددەت. دگەلدا گللە و گازندەیێن خەلکی ژی پتردبیت.

ئەڤ وەزارەتا ئەز بەحس ژێ دکەم، وەزارەتا پەروەردێ یە کو ل گۆر دیتن و باوەرییا من هەر بەرەف پاشە. ل بیرا منە بەری پتری سێزدە ساڵان ژی من درۆژنامەیا (میدیا)دا بەحسا ئالۆزی و بێسەروبەریێن ڤێ وەزارەتێ کربوو. ب تایبەتی کاریگەریێن وان یێن خراب ل سەر دەڤەرا مە. هەر ژ گۆهارتنا زمان و زاراڤەیێن پەرتووکان، هەتا دگەهیتە سیستەم، پەیرەوێن خاندنێ و ئامادەکرنا مامۆستایان کو هەر وەزیرەکی ل گۆر “زەوقێ” خوە گۆهارتن ئەنجامداینە. دەرئەنجام ژی وەکی ئەم دبینین، نزمبوونا ئاستێ پەروەردە، زانست و فێرکرنێ یە ل ڤێ دەڤەرێ. هەر دبەردەوامیا ڤان پێنگاڤێن بێسەروبەرێن ڤێ وەزارەتێدا، ئەڤساڵە “خرابترین” بڕیار دەرکر بۆ نەهێلانا بهێنڤەدان (پشوویا) رۆژا شەمبی. ب بەهانەیا نەبوون یان کورتییا دەم و وەرزێ خاندنێ کو ب باوەرییا من هیچ بنیاتەکێ زانستی بۆ نینە. بەڵگەیا زیندی ژی ل سەر ڤێ گووتنا من، نمرەیێن بلندێن قوتابی/ خویندکارێن قوناخا ئامادەیی یێن پارێزگەهێن سلێمانی و هەڵەبجە، کو وەرزێ خاندنێ ل دەف وان کێمتری سەد رۆژان بوو. لێ شیان باشترین نمرە بینن ل سەر ئاستێ کوردستانێ. ل بەرامبەردا وەرزێ خاندنێ ل دهۆکێ دووقات بوو، لێ ئەنجام دباش نەبوون! واتە کورتبوون و درێژبوونا دەمی هیچ کاریگەری سەر ئاستێ فێربوون و زانستێ نینە. ژبلی ئەگەر وەزارەتێ فێلەك کربیت!

ل ڤی سەردەمی ل وەڵاتێن پێشکەفتی پتر گرنگیێ ب دوو رۆژێن بهێنڤەدانێ ددەن، رۆژێن خاندنێ کێم دکەن و دەرفەتێ ددەن کو فێرخاز پتر ژ ژینگەها خوە فێرببیت. هەروەسا ل هەمی وەڵاتان پشوو و بهێنڤەدانێن سازیێن فەرمی یەکەن، دا دەرفەت هەبیت قوتابی و مالباتێن خوە ژی پێکڤەبن. لێ ب ڤێ بڕیارا وەزارەتا پەروەردێ، فێرخازی دەرفەتا فێربوونا ژ ژینگەها خوە نابیت. هەروەسا دەرفەت نابیت دگەل مالباتا خوە ژی بیت. ژبەرکو مالبات دپشوویێ دانە و قوتابی ل خاندنێ. ئەڤە ژی ب کورتی گۆپیتکا بێسەروبەری یە دگرنگترین وەزارەتدا، لەوما دشێم بێژم “خرابترین” وەزارەتە! دهەمان دەمدا پرسیاردکەم؛ کا ئەکادیمییەت، کا پیشەیی، کا هەڤسەنگی، کا ژیری، کا هەماهەنگی، کا بەرژەوەندیا گشتی، کا زیرەکی و کا حکمەت دڤێ بڕیارا وەدا؟!