مەزنترین داخازییا خەلکێ دەڤەرێ ژ پارتی

خەلکێ دهۆکێ و دەوروبەران، ئەڤ دەڤەرا دبێژنێ بادینان، ب درێژیا تەمەنێ پارتی دیموکراتی کوردستان پشتەڤانێن سەرسەختێن وێ بوون ل دژی داگیرکەر و هەڤڕکان. ڤی خەلکی پترین قوربانی ژی ب گیان و مالی دان. لێ پارتی کو پشتی سەرهلدانا بوهارا 1991ێ بوویە دەسەڵاتدار و فەرمانڕەوایا رەها ل دەڤەرێ، تشتەكێ تایبەت پێشکێشی ڤێ دەڤەرێ نەکر کو هەژی بیت. بەلکو بەروڤاژی، ئەڤ دەڤەرە بوویە هەژارترینا کوردستانێ. سەرباری ڤێ ژی خەلك یێ رازی و وەفاداربوو. تەنانەت دداخازکرنا سادەترین مافێن خوەدا ژی قوربانی ددا، دا نەبیتە بارگرانی بۆ پارتییا وان. ئەڤ هەمی قایلبوون، بێدەنگی و بهێنفرەهییا خەلکێ دەڤەرێ ژبەر یەك تشت بوو؛ ئەوژی خیتابا نەرم یا پارتی بوو.
پشتی ساڵا 2017، و نەمانا شەڕێن داعش و حەشدا شەعبی، کو دیسان خەلکێ ڤێ دەڤەرێ مەزنترین قوربانی دان بۆ بەرگریکرنێ ژ وەڵاتی و پرۆژەیێ پارتی دیموکراتی کوردستان، خیتابا پارتی ل دەڤەرێ هاتە گوهڕین، هەروەك ئاشنای سرووشتێ خەلکی نەبیت. دئەنجامدا کارڤەدان و هۆشداریا خەلکی هات و نێزیکی نیڤا وان بەشداری هەلبژارتنێن 2018ێ نەبوون. لێ پارتی گوهنەدایێ، لەوما دهەلبژارتنێن 2021دا کارڤەدان توندتربوو و ڤێ پارێزگەها بچووکا کوردستانێ و عێراقێ، کاندیدەکێ هەڤڕکێ پارتی کرە سەرکەفتیێ یەکەمێ عێراقێ. هەڵبەت ئەڤ گوهڕینا دخیتابا پارتیدا جهێ پرس و سەرسۆرمانێ یە. ژبەرکو پارتی هەردەم بانگا یەکرێزیێ دکەت و درووشمێ (ئارامی و ئاڤەدانی، پێکڤەیی و خوەراگری) بلندکرییە. لێ نوکە خوە دووردکەت ژ خەلکەکی کو سەرەکیترین داخازا وان “ئاخفتنا خوەشە”.!

• خودان و سەرنڤیسکارێ (رۆژئارتیکڵ).

Leave a Comment

پۆستی ئەلیکترۆنییەکەت بڵاوناکرێتەوە. خانە پێویستەکان دەستنیشانکراون بە *

Scroll to Top