بۆ مێژوویێ دنڤیسم، ھندی ئەڤ ھەردوو پارتە (پارتی دیموكراتی كوردستان، ئێكەتی نیشتیمانی كوردستان) د دەستھەڵاتێدا بمینین دێ دوو زۆنی و دوو ئیدارەیی یا بەردەوام بیت ل ھەرێما كوردستانێ و دەوڵەتبوون دروست نابیت. واتەیا ڤێ چەندێ، پرۆسەیا دیموكراتی ل ھەرێمێ ئێك جار نامینیت و ھەڤوەڵاتیێن ھەرێمێ ئارامیێ و ئێمناھیێ و ئەمانەت و كەرامەت و سەربەستیێ و سەرفەرازیێ د ژیانا خۆدا نابینن. ئەڤ ھەردوو پارتە دێ بەردەوام قەیران و گرفت و كێشەیان بۆ ھەڤوەڵاتیان دروستكەن و بەردەوام دێ ھەڤوەڵاتیان فێلكەن عیبادەت و تەقدیسا ھندەك كەسایەتیێن حزبی بكەن كو ئەو كەسایەتی مەرجعن و خودانێن ژیانا وانن و ھەكە ئەو كەسایەتی نەبن نوكە ئەو ھەڤوەڵاتی ل ھەرێما كوردستانێ نە دبوون.
ئەڤڕۆكە بانگەشەیا ھەلبژارتنانە بۆ پەرلەمانێ كوردستانێ، كو (25/9/2024) دەسپێكریە و دەنگدان دێ ل (20/10/2024)ێ بیت، وان ھەردوو پارتان بەرنامەیێ حوكمرانیێ بۆ چار ساڵێن بھێت نینە كو گرفتێن ژیانا ھەڤوەڵاتیان چارەسەر بكەن. تنێ گێڕانا ئاھەنگ و دانا بەرتیلان بۆ كڕینا دەنگێن ھەڤوەڵاتیان و ژ درەو دژایەتیا ھەڤدوو دكەن. ھەروەسا یێن بەحسی شۆرەشان و شەھیدان و رێبازا ھەردوو پارتان دكەن. واتە ئنیەتا وان ئەوە كو دێ د بەردەوام بن ب سیستەمێ شەراكەتێ د حوكمیدا.
پتریا كاندیدێن وان ھەردوو پارتان كورێن ئاغا و شێخ و شەھیدانە كو رێژەیا پتر ژ وان بێ باورنامە و شیانێن پەرلەمانینە. ئانكو جھێ وان پەرلەمان نینە و تنێ جھێ وان ئەو جادەیە ئەوا وێنێن خۆ لێ بەڵاڤەكرین و ئەڤ كاندیدە ئەگەر بھێنە ھەڵبژارتن بۆ پەرلەمانێ كوردستانێ، دێ وەك بەری نھا بۆ ھەڤوەڵاتیان كار ناكەن و بتنێ دێ بۆ پارتێن خۆ كاركەن.
فەلسەفا ھەردوو پارتان خزمەتا ھەڤوەڵاتیان ناكەت. چونكو ئەو ھەردوو پارت خۆ نابینن گرێدایی ب ھەرێما كوردستانێڤە، چ ژلایێ ئاخ و ریبار و ئاسمانێ كوردستانێ بیت، یان ژلایێ نەتەوەیی و نیشتیمانی و ئاین و ھزر و بۆچوونێن كوردستانێ بیت. ئەڤجا ل (20\10) دڤێت د دەستھەڵاتێدا نەمینن و ھەڤوەڵاتی چارەنڤیسێ حوكمرانیێ ل ھەرێما كوردستانێ دەستنیشان بكەت و رۆژا دەنگدانێ دەنگ ب پارتی و ئێكەتی نەدەن و ھەردوو پارت بھێنە سزادان و پاش بھێنە دادگەھكرن لسەر كەیسێن گۆمركێن سنووری و فڕۆتنا گازا نیشتیمانی ب قاچاغ و داھاتێ ناڤخۆ و بڕین و نەدانا مووچەیێن مووچەخۆران و گرانیا پانزین و گازێ و زێدەكرنا باجەیان و تێكدانا ژیانا ھەڤوەڵاتیان و چەندین كەیسێن دیتر.
• رێڤەبەرێ نڤیسینێ