ئەڤ گۆتنە دانپێدانە ب شكەستنێ

 

 

 

 

 

 

 

باوەر مەجید*

ل رۆژا سێ شەمبێ رێكەفتی (5\9\2023)ێ ل باژێرێ دھۆكێ كو دھێتە نیاسین ب خزینەیا دەنگێن پارتی دیموکراتی كوردستان، ب سەرپەرشتیا رێكخراوێن سەر پارتا ناڤبریڤە ب ژڤان بوو خۆنیشاندانا ملیۆنی ئەنجام بدەت دژی حكوومەتا عیراقێ ب سەدەمێ نەھنارتنا بودجەیا ھەرێما  كوردستانێ. لێ ل دووڤ داخازا رێكخراوێن ناڤبری چەند ھزار ھەڤوەڵاتی بەژداری خۆنیشاندانێ بوون. ئەوژی كۆمەكا فەرمانبەران ل دەمێ دەوامێ داخازكر بوون دگەل موختارێن چەند گەرەكان و مەلایێن سەر پارتا ناڤبریڤە و ئەندام و کادر و لایەنگرێن حزبی و چەندین فەرمانبەرێن بن دیوار و مەلاق.

ل دووڤ دیتنا من چەندین سەدەم ھەبوون ئەڤ خۆنیشاندانە سەرنەكەڤیت، پتریا ھەڤوەڵاتیان بەژداری خۆنیشاندانا ملیۆنی نەبوون و خۆنیشاندان بۆ یا ھزاری د جەرگێ پارتا ناڤبریڤە. چونكو ھەموو ھەڤوەڵاتی ژ دەستھەڵاتا ھەرێمێ بێ ئۆمێدن و ھەموو لایەن ڤێ چەندێ دزانن. ژبلی هندەك “مەلاقان” و وی “مەلا”یێ بەژداری خۆنیشاندانێ بووی و گۆتی: “ئەو كەسێ بەژدارنەبووی ھاریكارێ دوژمنییە و كوردەكێ رەسەن نینە و خۆفروشە”. ئەڤە ھەر ئەو مەلایە بوو كو رۆژا ریفراندۆمێ ل (25\9\2017)ێ دگۆت: “نڤێژا مری ل سەر عیراقێ ناكەین”. ھەروەسا ئەو كەس و رێكخراوێن پارتی ل خۆنیشاندانێن ریفراندۆمێ دگۆتن (رۆژا تەلاقدانا عیراقێ و بای بای عیراق) ئەو بەژدار نەبوون و ھندەك ژ خەلكی ب زۆری پاڵدا خۆنیشاندانێ. دیسان ئەو كەسێ ل ریفراندۆمێ بێدەنگ بووی و دگۆت عیراق (موفلیسە) ئەڤرۆكە ژی یێ بێدەنگە، یا ژ ڤێ خرابتر ھندەك مەلاقان وێنێن سەرۆكێ حكوومەتا ھەرێمێ بەلاڤكرنە و ل سەر نڤیسیە خۆراگر ل وی دەمێ ھەڤوەڵاتیێ بێ مووچەیە.

ھەموو جاران دەمێ خۆنیشاندان ھاتینە ئەنجامدان ژبۆ داخازكرنا مافیێن ھەڤوەڵاتیان ژ حكوومەتا ھەرێمێ ب خۆفرۆشی ھاتینە قەلەدان ڤێ جارێ ئەو ھەڤوەڵاتیێن بەژداری خۆنیشاندانا پارتی نەبووین دیسان ب خۆفرۆشی ھاتنە قەلەدان. ئەڤ سەرنەكەفتنە گەھشتە وی رادەی پارێزگارێ دھۆكێ سەر كێموكاسی و خەمساریا وی د كارگێریا پارێزگەھێدا بێژیت (قیر و سیر ل سەر مووچەی بن ما مە شۆرەش بۆ مووچەی كریە). ئەڤ گۆتنە دانپێدانە ب شكەستنێ. مخابن یێ شۆرەش نەكری وەبێژیت. شۆرەشڤانان شۆرەش نەكریە كو هندەك کەس ژ ئیرانێ بھێنە ھەولێر و سلێمانیێ ب خوینا وان شۆرەشڤانان ببنە خودان ملیارێن دۆلاران و ب سەدەمێ وان خێزانان شۆرەشڤان و زارۆیێن وان مووچەی وەرنەگرن.

ئەڤا ئەڤڕۆكە چێدبیت ل ھەرێما كوردستانێ نیشانێن نەمانا دەستھەڵاتا ھەرێمێنە كو یا سەركەفتی نەبوو د ئاڤاكرنا كوردستانێدا و ھەر ئەو دەستھەڵات سەدەمێ نەمانا قەوارێ ھەرێمێنە. چونكو وان نەڤێت پشتی نەمانا وان چ ھەرێم ھەبن.

• رێڤەبەرێ نڤیسینێ