قەهرەمان عەبدلڵا حەمید
بلا عەشق
ببیتە گولەکا ڤاژى
هاتیە قەتاندن
بلا بەفر
ببیتە مویێن پرچا هەسپێ سپى
دا با یاریا ب داڤێن وێ بکەتن چەپ و راست
دا ژ لەپێن رەپ و رویتێن پەروانەیا ئاشتى بباریتن چەپ و راست
دا شەل و شەپکێن کاویس ئاغاى بهێنە گۆڤەندا غاندى چەپ و راست
بلا بێژن
لۆ لۆ دە خالۆ
چەمێ چەقەلێ چەمەکێ وانە
یێ پرى رویڤى و گور و بەکوانە .. دە خالۆ
دە خالۆ
دەستێ من د کەلەمچێ دا
رزینە خالۆ
ئەز دێ ل ڤێ دنیایێ
ژ تێربوونێ تێربوویمە دە خالۆ
بەندێ وندابوونا رێکا بەندەکێ گرانە دە خالۆ
سەرهەڤسارێن سەر ئەزمانێ نەرزینە خالۆ
دە خالۆ
ل چیایێ زاوا و
ل کێلەکا گزیرتا چاڤکەسک
مرادا دەولەتبوونا ناخێ من
یا بێ خودانە دە خالۆ
دە خالۆ
ئەز و خانى
د نامۆبوونا دێمێ هەیڤێ دا مانە دە خالۆ
چاڤێن مە ب دوو رووییاتى و
زکرەشیا نەهەنگێن دەریا وانێ ڤە مانە دە خالۆ
و ژ ستێرێن ئەسمانێ سیس دل ب گومانە دە خالۆ