بلا ئەو “ئەی رەقیب”ە ل قوتابخانەیێن دهۆکێ نەمینیت

 

 

 

 

 

 

 

 

سەرنڤیسکار

ددەمێن دەربازبووییدا بۆ دووڤچوونا هندەك کاروبارێن خاندنێ یێن خوە و زارۆکێن خوە، من سەرەدانا هندەك قوتابخانە و بنگەهێن خاندنێ دکر ل دهۆکێ. تشتێ سەرنجا من راکێشای تابلۆیا سروودا “ئەی رەقیب” بوو کو دشێم بێژم ل هەمی قوتابخانەیان هاتییە هەلاویستن. ئەڤ تابلۆیا رەنگ سۆر- پرتەقالی کو ب شێوەزارێ کرمانجیا سەری (بادینی) هاتییە نڤیسین، ب شێوەیەکێ گەلەك بێسەروبەر هاتییە “وەرگەراندن” و ئامادەکرن، ژبەرکو ناڤەرۆکا وێ نە وەکی هەلبەستا رەسەنە. بۆ نموونە هەر ل دەستپێکێ وتا دوماهیێ دلدار داکۆکی و جەختێ ل سەر وێ یەکێ دکەت کو کورد نەمرییە و هەر یێ زیندییە، “کەس نەڵێ کورد مردووە، کورد زیندووە”. لێ د دانەیا کرمانجییا سەری (بادینی)دا نڤیسییە: “کەس نەبێ کورد دمرن، کورد ژین دبن”، ئانکو هەر وەکی کورد ددەمەکیدا یێ مری و نوکە ژنوی یێ دژیتەڤە! ل جهەکێ دیژی دلدار دبێژیت: “زیندووە قەت نانەوێ ئاڵاکەمان”، ئانکو زیندییە و ئاڵایێ مە ژی قەت نزم یان خوار نابیت و ناچەمیێت. لێ دبادینیێ دا هاتییە: “ژین دبێ قەد ناکەڤێ ئالا کوردان”. واتە “دژیت و قەت ناکەڤیت ئاڵا کوردان”. دلداری گووتیە “ئاڵاکەمان” ئانکو “ئاڵا مە”، لێ د بادینیێدا کرییە “ئاڵا کوردان”. ئانکو دلدار و کورد ژێك جوداکرینە. هەروەسا گەلەك رستە و مالکێن وێژی بەرەڤاژینە و تەنانەت ل هندەك جهان هیچ رامانێ ژی نادەن و ناهێنە تێگەهشتن! بۆ نموونە ل جهەکی دلدار دبێژیت: “سەیری کە خوێناوییە رابردوومان”، ئانکو بەرێ خوە بدە دیرۆکا مە یا ب خوینە. لێ یا بادینی نڤیسییە: “سەیر بکە خوینا وییە مە دا رژاند”! کو ب راستی ئەز ب خوە قەت ڤێ مالکا (بادینی) تێناگەهم!

بۆ زانین بەری چاردە ساڵان من گووتارەك ب ناڤنیشانێ (بلا “ئەی رەقیب”ا دلداری وەکی خوە بمینیت) ل دوو رۆژنامەیێن کوردستانێ ل دهۆك و سلێمانیێ بەڵاڤکربوو. من ب درێژی بەحسا شێوەزار، رێزمان، راستنڤیسی، رامان، رستە و مالكێن وێ کربوو. لەوما من نەڤێت ل ڤێرە دووبارە وێ چەندێ بکەم و یەك ب یەك وان خالان بەحسبکەمەڤە. تنێ دبێژم پێویستە وەزارەتا پەروەردێ چاڤخشاندن و پێداچوونەکێ تێدابکەت و ڤێ بێسەری و شاشییا مەزن راستڤەکەت و نەهێلیت. ژبەرکو ب دیتنا من شەرمەکا مەزنە ب تایبەت بۆ کەرتێ پەروەردە و فێرکرنێ کو شاشییەکا هندە زەق، دیار و ئاشکرا هەبیت و نەهێتە چارەسەرکرن. هەروەسا بێوەفاییە بەرامبەر دلدارێ خودانێ وێ و دهەمان دەمدا بێرێزییە ژی بەرامبەر ب دەهان ملیۆن کورد و کوردستانیان. لەوما ب باوەرییا من یا دروست ئەوە سروودا نیشتیمانی “ئەی رەقیب” ل بادینان، ل موکریان، ل بۆتان، ل بابان، ل جزیرێ، ل سۆران، ل گەرمیان، ل هەکاری، ل باشوور، ل رۆژهەڵات، ل رۆژئاڤا، ل باکوور یان ل هەر پارچەیەکا خاکا کوردستانێ ب شێوەزارێ خوە بهێتە بەڵاڤکرن و ژبەرکرن. واتە ب شێوەزارێ کرمانجییا خارێ (سۆرانی) کو زمانێ مەیە و ئەڤ “ئەی رەقیب”ا ل قوتابخانەیێن دهۆکێ یا ب ناڤ “کرمانجی- بادینی” یا شاش، سەقەت، بێسەروبەر و بێرامان بهێتە ژێبرن و لادان.

 

 

ئەی رەقیب (کرمانجییا ژێری- سۆرانی):

ئەی‌ ڕەقیب ھەر ماوە قەومی کورد زمان

نایشکێنێ دانەیی تۆپی زەمان

کەس نەڵێ کورد مردووە، کورد زیندووە

زیندووە قەت نانەوێ ئاڵا‌کەمان

 

ئێمە ڕۆڵەی ڕەنگی سوور و شۆڕشین

سەیری کە خوێناوییە ڕابردوومان

کەس نەڵێ کورد مردووە، کورد زیندووە

زیندووە قەت نانەوێ ئاڵا‌کەمان

 

لاوی کورد ھەستایە سەر‌ پێ وەک دلێر

تا بە خوێن نەخشی بکا تاجی ژیان

کەس نەڵێ کورد مردووە، کورد زیندووە

زیندووە قەت نانەوێ ئاڵا‌کەمان

 

ئێمە رۆڵەی میدیا و کەیخوسرەوین

دینمان، ئایینمان ھەر نیشتمان

کەس نەڵێ کورد مردووە، کورد زیندووە

زیندووە قەت نانەوێ ئاڵا‌کەمان

 

لاوی کورد ھەر ‌حازر و ئامادەیە

گیان فیدایە، گیان فیدا، ھەر گیان فیدا

کەس نەڵێ کورد مردووە، کورد زیندووە

زیندووە قەت نانەوێ ئاڵا‌کەمان

 

………………………………………

 

ئەی رەقیب (کرمانجییا ژۆری- بادینی):

ئەی رەقیب ھەر مایە قەومی کورد زمان

ناشکێ و دانایێ تۆپی زەمان

کەس نەبێ کورد دمرن کورد ژین دبن

ژین دبێ قەد ناکەڤێ ئالا کوردان

 

ئەم خۆرتێن رەنگێ سۆر و شۆرەشین

سەیر بکە خوینا وییە مە دا رژاند

کەس نەبێ کورد دمرن کورد ژین دبن

ژین دبێ قەد ناکەڤێ ئالا کوردان

 

ئەم خۆرتێن میدیا و کەیخوسرەوین

دینمان و ئاینمان ھەر نیشتیمان

کەس نەبێ کورد دمرن کورد ژین دبن

ژین دبێ قەد ناکەڤێ ئالا کوردان

 

لاوێ کورد رابوویە سەر پێ وەک شێران

دا بخوین نەخشی بکێ تاجی ژیان

کەس نەبێ کورد دمرن کورد ژین دبن

ژین دبێ قەد ناکەڤێ ئالا کوردان

 

لاوێ کورد هەر حازر و ئامادەیە

جان فیدایە جان فیدا ھەر جان فیدان

کەس نەبێ کورد دمرن کورد ژین دبن

ژین دبێ قەد ناکەڤێ ئالا کوردان

 

Leave a Comment