بکارئانینا کەرەستەێن بێهۆشکەر کریارەکا مەترسیدارە

 

 

 

 

 

 

 

 

زەنوون سلێڤانەی- زاخۆ

بێگومان ب درێژاهیا مێژوویێ رژێمێن دەستهەلاتدارێن ستەمکار هەمی رەنگێن جەنگێ دژی مرۆڤان بکارئانینە و نەخاسمە دگەل وان گەل و نەتەوەێن بندەست و ستەملێکری کو ژ پیخەمەت پاریێ نانێ ژیانێ و ماف و چارەنڤیسا خوەیا پاشەرۆژێ دنالیت. بەلێ گەلێ کورد ژی تووشێ ڤێ جەنگا قڕکرن و تەپەسەری و داگێرکرنێ بوویە، ژبلی جەنگا سیاسی و دەروونی و قوتکرنا قویتێ خەلکێ و هەیا نها ژی هێشتا ئەڤ جەنگە ل سەر گەلێ مە ژی ب داوی نەهاتیە. مە ل ڤێرێ ب فەر دیت ئەم ل دور بابەتێ بازرگانیکرن و بکارئانینا کەرەستەیێن بێهۆشکەر بنڤیسین وەکو کریارەکا مەترسیدار، کا ژ کیڤە هاتیە، چاوا پشکەك ژ باژێر و دەڤەڕێن هەرێما کوردستانێ ژی ڤەگرتیە و باندۆرا وێ یا نەرێنی و خراب ل سەر ئاسایش و تەناهیا گیانێ مرۆڤان دناڤا هەر وەلاتەکی دا.

هەلبەت پەروەردە دەسپێکا ژیانەکا ساخلەمە بۆ خیزانێ و بۆ جڤاکەکێ ساخلەم و وەلاتەکێ ئاڤا و ئاڤەدان. گەر سەحکینە پشکەك ژ ڤی جڤاکێ مە دێ بینین دەولەسەرێ بازرگانی و پەروەردەیا خاڤ و سەقەت گەلەك تەخێن جڤاکێ مە یێ تووشی خەلەتیێ و پاشەرۆژەکا تاری دبن. ژ وانا رێژەیەکا تەخا سنیلەیان کو ژ ئەگەرێ کێمترخەمی و پەروەردەیا خیزانێ و پاشی یا خواندنگەهێ و نەهشیارکرنا سنیلەیێ ئەڤرۆ یێ تووشی ڤێ کریارا بکارئانینا کەرەستەێن بێهۆشکەر و تەکنۆلۆجیا ژ تەمەنێ خوە ب چەند سالا مەزنتر دبن. ئەڤەژی کارڤەدانێت نەرێنی و مەترسیدار و خرابن بۆ ئاڤاکرنا جڤاکەکێ ساخلەم و ئاڤاکەر. لەورا ژی دڤێت ل دەسپێکێ هەر ژشەقامی بگرە وهەتا بۆ ناڤا ئەندامێن خیزانێ ئەم بهەڤرە خوە فێری مەشق و راهینانێن هشیارکرنێ و هشیارببن ل سەر ژیان و تێکەلیا زارۆکێن خوە دگەل دەوروبەرێن وی. دیسان ئەرکێ هەری مەزن ل سەر شیانێن پەروەردێ دمینیت، چونکە ل دەسپێکێ پەروەردەیە و پاشی پێگەهاندن و فێرکرنە ژ ئالیێ خوەڤە ئەو هایداری رەوشا قوتابی ببن. هەلبەت یا فەر و پیدڤیە جهێن پەیوەندار و هەماهەنگیێ دگەل ناڤەند و سەنتەرێن رەوشەنبیری و جڤاکی و رێکخراوێن سڤیل و مافێ مرۆڤ و میدیاکار و راگەهاندن بکەن بۆ کۆمکرنا بەلگە و بدەستڤەئانینا زانیاریێن دروست ل دور بنبرکرنا هەمێ جۆرێن کەرەستەیێن بێهۆشکەر و پێگەهاندن چ ب رێکێن سازدانا کورو سمینارو وركشۆپ و پەخشکرنا پرۆگرامێن تایبەت ل دور ڤی بابەتێ گرنگ و وێ رێژەیا سنیلەیێن کچ و کور هشیار بکەن و قەدەغەکرنا ڤێ بازرگانیکرن و بکارئانینا کەرەستەێن بێهۆشکەر ل کوردستانێ رۆلێ خوە رابن و نەبتنێ ب مژویلکرنا کارێن پیرۆزباهیێ و بەشداری و وێنە ب تنێ بن. ب دیتنا من گەر هەر ل دەسپێکێ ب ڤی رۆلی راببان ئەڤرۆ پشکەك ژ ڤی جڤاکی تووشی ڤێ کریارا کوژەك و مەترسیدار نەدبوون دێ بمخانیڤە بێژین رۆلێ وان ب تنێ ناڤە و بێ کریار.

(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)

Leave a Comment