پشتی مرنێ چاڤ کولی نینە

 

 

 

 

 

 

 

 

زەنوون سلێڤانەی- زاخۆ

دیارە هەر ژ سەردەمێن باب و باپیرێن مە و هەتا نوکە بوویەرێن بەردەوام هەبوونە و هەیا نها ژی ب داوی نەهاتینە و چ جاران ب داویێ نائێت ژی. هەڵبەت یا خوەیایە کو د ماوەی ڤان رۆژێن دەربازبوویێ دا چ بوویەر ل هەرێما کوردستانێ و ب تایبەتی ل باژێرێ ئاکرێ رویدایە. مەبەستا من بوویەرا حاکم گۆرانە کو ب گولەیەکا تڤەنگێ ژیانا خوە ب داوی ئانیە و ب تنێ وەسیەتا خوە یا (ئێکرێزی و چاکسازی و سەرخەبوون) ل پاش خوە هێلایە.

جارێ پیدڤی ناکەت ئەمژی بێژین حاکم گۆران کی بوو، ژ کیڤه هاتیە، چ کریە و چ نەکریە. جهێن پەیوەندیدار، میدیا، رێکخراوێن مەدەنی و رەوشەنبیریێن مە ژی هەمی پێ ئاگەهـ بوون کو ل دەمێ رێفراندۆما گەلێ کوردستانێ ئەوا کو ل رۆژا ۲٥ ێ ئیلوونا یا سالا ۲۰۱۷ێ داهاتیە ئەنجامدان، حاکم گۆران ژ دەرڤەی هەرێمێ ڤەگەریا بوو و خۆ ل سەرێ چیایەکی ئاسێ کربوو ب هیڤی و ئۆمێدێن دەولەتبوونێ، لێ وێ پێنگاڤا وی سەرنەگرت. جارێ مە نە دڤێت زێدەتر بابەتی درێژبکەن کا بۆچی حاکم گۆرانی خوەکوشتن هەلبژارت. لێ ل ڤێرێ جهێ پرسیارێ یە ئەرێ ئەرکێ رێکخراوێن مەدەنی، مرۆڤایەتی، ناڤەند، سەنتەرێن جڤاکی و رەوشەنبیران چییە؟ ئایە هەتا رادەکێ شیاینە خوە نێزیکی وی بکەن و دەستێ هاریکاریێ بۆ درێژبکەن و رۆلێ خوەیێ کاریگەر دیتینە حاکم گۆرانی رازی بکەن کو وەك هەر هاوەلاتیەکی کورد ب ئاسایی ژیانا خوە برێڤە ببیت و ژ چیایێ بیننە خوارێ و خزمەتێن باشتر بۆ دابین بکەن؟

یا دیارە و هەمیان ژی دزانی کو رۆژانە دتۆرێن کۆمەلایەتیدا هەر ئێكی ب رەنگەکی ب باشی و خرابی رەخنە ل ڤی جامێری دگرتن. ئەڤێ چەندێ ژی باندۆرەکا نەرێنی ل سەر دەروونێ وی کریە، ژبلی بانگەوازیا وی یا بەردەوام بۆ ئێگرتن و ئێکرێزیا ناڤ مالا کوردی و چاکسازی و سەرخەبوونێ. ئەڤ هەمی هیڤی و ئۆمێد دناڤ ناخ و هەست و دەروونێ ویدا هشك مانە هەلاویستی. لەوما جهێ داخێ یە کو حاکم گۆرانی ژیانا خوە بداوی ئانی و کوشتنا وی بوویە جهێ گەنگەشێ و هەر ئێک ب رەنگەکی خەمباریا خوە دەربریت دتۆرێن کۆمەلایەتیدا. چیرۆکا کۆشتنا وی ژی دێ بۆ ماوەیەکێ ل سەر زار و زمانێ خەلکێ ئێتە گۆتن، پاشان هێدی هێدی ئەڤ بابەتە ژی دێ ئێتە ژبیرکرن و دێ ب داوی ئێت. ژ خوە وەک مەزن دبێژن (پشتی مرنێ چاڤ کولی نینە).

(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)

Leave a Comment