پیرۆزکرن، دیکتاتۆران بەرهەم دئینت

 

 

 

 

 

 

 

 

عەدنان محەممەدتاهر هەرنی- ئاکرێ*

هەر مرۆڤەکێ سەر رویێ ئەردی خودان رێز و قیمەتە. چ جوداهی دناڤبەرا واندا نینە. تنێ ئەو نەبن یێن یاسا و سنورێن ئاسمانی و ئەردی دبەزینن. مرۆڤێن باش پێتڤی رێزەکا باشترن کو لێ بهێتە گرتن. رێزگرتن ژ زارۆکان هەتا دگەهیتە زانا، سەرکردە و ردێن سپیان تشتەکێ جوان و پێتڤیە. دڤێت رێزێ ل بیروبۆچوون و ئایین، نەتەوە، زمان و رەنگێن جودا بگری. نابیت روحا مرۆڤاتی و رێزگرتن دناخێ مرۆڤاندا بمریت دگەل دەوروبەر. بەس دێ هێین بەرێ خۆ دەینێ کا چەوا مرۆڤ دبن دیکتاتۆر ددەمەکیدا کو رەنگە ئەڤ کەسە بەری وەخت کەسەک بیت دژی دیکتاتۆریەتێ بیت. خەبات و شۆرەش دژی دیکتاتۆران کریە. بەلێ ئەگەر ژ بلی رێزگرتنێ مرۆڤەک زێدە هاتە پیرۆزکرن، دیسان ئەگەر ڤی کەسی ئەڤ پیرۆزیە قەبیل کر و پێ خۆش بوو، وی دەمی دێ بەرەف دیکتاتۆریێ چیت.

ئیجا هەر کەسەک دهەر پێگەهەکێدا بیت، تایبەت ئەگەر ئەم بەحسێ سەرکردان بکەین، دێ بینی زۆر جار کەسێن نێزیکی وی ب جۆرەکێ بێ سنور دێ پیرۆزکەن. دێ نیشان دەن کو تۆی و کەسێ دی نییە. دێ بێژن هەر تۆی یێ راست، زانا و لێهاتی و کەسێ دی نییە. ئیجا دێ ب گوتنا ئەزبەنی، ئەزخولام و خۆ چەماندن دێ پتر سەری لێ گەرم کەن. تەنانەت ئەڤ بەرپرسە بڕیارەکا نەدروست بدەت، کەسێن دەوروبەر ئەو دل نییە بێژیت ئەڤ بڕیارە درووست نییە. هەر دێ بێژن قوربان تۆ یێ دروستی ئەڤ سەرکردە دەمێ وتارەکێ پێشکەش دکەت دێ چەپلا بۆ لێدەن. ئەگەر سوحبەتەکێ بکەت دێ پێ کەنن. ئەگەر عاجز ببیت دێ بۆ گریێن. ددەمەکیدا کابرا هەرێ نزانیت کا چ مەسەلەیە و چ رویدایە!. لایەکێ دی دێ راگەهاندن ب هەمی جۆرێن خۆڤە (بینین، بهیستن و نڤیسین) کەڤن خزمەتا ڤی کەسی. ئەڤە هەمی دێ چنە قالبێ پەرستنێ دا. دیماهیکێ دێ گەهیت وی ئاستی ئەڤ سەرکردەیە دێ بێژیت ئەزم و کەسێ دی ژ من باشتر نییە. رەخنەیێن جودا و پارتێن جودا قەبیل ناکەت، ئایین و نەتەوەیێن جودا قەبیل ناکەت، رێکێ نادەت ژ بلی وی کەسێ دی بڕیارێ بدەت، راوێژێ ب چ کەسی ناکەت و ئەگەر بکەت دێ کەسێن مەلاق کەت کو ئەڤان کەسان چ جارا بۆچوونێن جودا نەگوتیە. هەر کەسەکێ دویڤ بڕیار و داخازیێن وی نەچیت یان رەخنەکا جودا هەبیت، دێ ب مرۆڤەکێ نەدروست قەلەم دەن.

زۆر کەس هندە یێن هاتین پیرۆزکرن، تەنانەت پشتی مرنا وی دێ گۆڕێ ڤی کەسی نەخشینن. تایبەت ئەڤە دەف هەلگرێ پەیرەوێن ئایینی هەیە. بەردەوام دێ خەلکەک سەرەدانێ لێ کەت و دێ وەسا نیشان دەن کو قەبرێ وی پیرۆزە. ئەڤ کەسە دێ شێت مریاتی مفای گەهینت خەلکی. راستە نابیت مرۆڤ باشیا مریان ژبیر بچیت و دڤێت رێزێ گۆڕێ وی بگری. بەس نە ل وی ئاستی پیرۆزکرن کو ب پەرستن بهێت قەلەم دان. زۆر پێتڤیە هەر مرۆڤەکێ هەبیت رەخنەیێن جودا ژ خەلکی جودا قەبیل بکەت. دڤێت زانا و سەرکردە ژ کەسێن نزیکی خۆ هشیار بن و مغرور نەبێن. ڤێت بزانن ئەویش مرۆڤن و وان کێماسی یێن هەین. دهەمان دەمدا دڤێت هەر کەس خۆ ل وی ئاستی کێم، نەزان و نەفام نەکەت کو شکۆیا خۆ ژ دەست بدەت و دەرفەتێ نەدەتە عەقلێ خۆ بیر بکەتەڤە. ئەڤ کەسە ل دویماهیێ دێ وەکو کوێلەکێ دیکتاتۆر پەرست بەرنیاس بیت.

  • مامۆستا

(گووتار دەربڕینا نڤیسکارانە، نەیا سایت و گووتارنامەیا رۆژئارتیکڵ)

Leave a Comment