دەستھەڵات ل سەر سەرێ گەنجان سەمایێ دكەت

رێڤەبەرێ نڤیسینێ

سەدەمێ سەرەكی یێ بێ ئۆمێدبوونا گەنجان كو گەنج داخازا مافێن خۆ یێن رەوا نەكەت و بەرەڤ دەرڤەی وەڵاتی بچیت، دەستھەڵاتا دووبارەیە. چونكو پشتی سەرھلدانا ساڵا (1991) تا نھا چەند سەر و چاڤێن دووبارە خۆ كرینە دەستھەڵاتدارێن حكومڕانیێ ل ھەرێما كوردستانێ. ئەو گەنجان بكاردئینن بۆ بەرژەوەندیێن خۆ و بانگەشەیا پارتێن خۆ ل ھەلبژارتنان. یاریان ب گەنجان دكەن و دەلیڤێن ژیانا سەركەفتی بەرامبەری گەنجان بەرزە دكەن. خزمەتكرنا گەنجان ژلایێ وان دەستھەڵاتدارانڤە تنێ گۆتن بوویە و كریار نینە.

ب شێوەكێ گشتێ گەنج یێ بێكارە، ئانكو دەلیڤێن كاری بۆ ناھێنە دابینكرن ژلایێ دەستھەڵاتێن دووبارەڤە. ئەڤێ چەندێ چاڤ تاریبوون ل دەف گەنجان پەیداكریە. چونكو پشتی ھەلبژارتنان ئەو سەروچاڤێن دووبارە و دانعەمرێن ژ كاركەتین دێ پایەیێن دەستھەڵاتێ ل ھەڤدوو پارڤەكەن و حكومڕانیا خۆ یا كەڤن ئەوا گەنج بێ ئومێدكری دێ دووبارەكەن. ئەڤە ژی دبیتە سەدەم كو گەنج بھێتە پاشخسن و دویركرن ژ پاشەرۆژەكا گەش كو ئەو گەنج نەشێت خۆ و خێزانا خۆ خودان بكەت.

لەوما گەنج بێ ئۆمێد بوویە ژ حكومڕانیا وان و قەستا دەرڤەی وەڵاتی دكەت. ب ھزاران ژ ڤان گەنجان ل گەل خێزانێن خۆ خەندقینە د دەریایاندا دەمێ قەستا دەرڤەی وەڵاتی دكەن. ئەڤ تاوانە دستۆیێ وان دەستھڵاتدارانە ئەوێن حكومڕانیێ بۆ خۆ و خێزانێن خۆ و پارتا خۆ بكاردئینن.

دڤێت كەیسا چوونا ھەڤوەڵاتی بۆ دەرڤەی وەڵاتی ب ھووربینی بھێتە خواندن ژلایێ وان دەستھەڵاتدارانڤە ئەوێن سەمایێ ل سەر لاشێ وان و زارۆكێن وان دكەن. سیاسەتا ڤێ دەستھەڵاتێ گەنجی بێ ھیڤیدكەتن كو گەنج داخازا مافێ ژیانەكا سەرفەراز نەكەت. لەوڕا یا گرنگە ھیڤیان بۆ گەنجان پەیدا بكەین. گەنج ببیتە خودان كار و خودان داھاتەكێ تایبەت كو بشێت ب سەرفەرازی خێزانا خۆ برێڤەببەت و پاشەرۆژەكا سەركەفتی بۆ بھێتە مسۆگەركرن.

Leave a Comment