دلۆڤان حەسەن رەزیکی
هندەک لایەن هەر ژ نها دێ بەریکێن هندەک بناڤ (هەلبەستڤان، مەڵا، مەلاق، کادر و…هتد) پڕی پارە کەن و بەردەنە ناڤ خەلکێ ژارو بەریک ڤالا و خوەدی سەدان کێماسی. دێ باس ل مێژوویا خوە کەن و کوردستانێ ب مولکێ خوە دانن. لێ گرنگە بزانین و بینینە هزرا خوە کو سەرباری سوپاسگوزارێن (شوڕەشگێڕ، مێرخاز، جانگوری و خەباتکەرێن) خوە یێن راستەقینەینە. لێ ئەڤێن دبێژن “مە کوردستان یا کریە کوردستان” هەرچەندە پڕانیا وان جاشبوون و چ بۆ کوردستانێ نەکریە. لێ ئەگەر تشتەک کربیت ژی، ئەگەر قەرەبوویا زەحمەتا خوە دڤێت دەهجارکی هندی وێ یا کری خار، بر، کرە دیاری و پێشکێشی خۆشتڤیێن خوە کر، تێرا دەهـ پشت بابان بۆ خوە ئاڤاهی ئاڤاکرن، پارە د بەنکان دا دانان…هتد.
دیسان ژ کوردینییا وان یێ ب گۆمانم، چونکی ئەگەر وان بۆ کورد و کوردینیێ کربایە، نها دا هەمی بزاڤا کەن رۆژێن رەش سپیکەن، یەکسانی و دادیێ دناڤ خەلکیدا بەرپاکەن. ناپلیون دبێژیت: (مرۆڤێن تێنەگەهشتی باس ل رابردووی دکەن و زانا مژیلی ئەڤرۆنە…) لەوما گرنگە بەرپرسێن مە ژی ئێدی سەرێ مە ب رابردوویی ڤە گێژنەکەن و بلا هزر د داهاتیدا بکەن. چونکی پڕانیا ئەڤێن ب دروستی ئەڤ وەڵاتە گەهاندییە ڤێ ئازادیێ، ئەون یێن نها ژ نەچاری دەستێ خوە ل بەر جاشەکی درێژدکەن. پڕانیا وان یێن ب هەیڤان مالێن خوە سەرا کوردینیێ هێلاین و چووینە چییایان ب “بەڕوویان و بەلگێن داران” خوە ل ژیانێ هێلای و شۆرەش بەرپاکرین، نها یان کرێدارن یان یێن دبن خانیێن ئاخێ ڤە یان ژی ب نیڤا وێ ژیانا جاش پێ دژین ئەو د وێ خۆشگوزەرانیێدا ناژین.
ئەرێ ما نابێژن (دارەکا کوردستانێ نینە خوینا مێرەکێ کورد یان شێرە ژنەکا کورد ل بن نەهاتبیتە رێژتن) مانە دبێژن: (بۆستەکا ڤێ ئاخێ نینە جانەمەرگەکی جانێ خوە سەرا نە کربیتە گۆری) ئەرێ ئەڤێن ل سەرا (ئالا، زمان، نامیس، دار، ئاڤ و ئاخ)ێن ڤی وەڵاتی بووینە جانگۆری ما هەمی کوڕ و نەڤیێن وانن یێن نها د ڤێللەیان دا دژین؟! ئەرێ کوردینی بتنێ وان کریە یێن نها کوردستان بۆ خوە کریە بەهەشت و ل هەژاران ژی کریە دۆزەخ، ئەرێ ما هەژارێ خێر ل خوە نەدیتی، ئەڤێ ل ئەرکێ پێشمەرگایەتیێ دزڤریت و دچیت ب دارێ دارتاشیێ خانی و ڤێللەیێن بەرپرسان گرێددەت، دا زارۆیێن خوە ببەتە خواندنگەهێ و پشتی کولیژێ تمام دکەن دا ببنە سکرتێرو زێرەڤان و خولامێن کوڕێ بەرپرسەکی، چ گونەها خوە هەیە، ما وی وەڵات فرۆتییە، وی ئالا سووتییە، وی گۆتییە هەڤالێن خوە یێن پێشمەرگە میلیشات و ب کرێ گرتی؟ ئەرێ ئەو کوڕێ شەهیدی یێ کولیژە تمامکری و بوویە شوفێڕێ کوڕێ بەرپرسەکێ تفەنگا چیچکان و بڕنوویێ ژێک جودا نەکەت، کێ پتر ماف د خۆشگۆزەرانیا ڤێ ئاخێ دا هەیە؟ ئەرێ مانە ئەم خشیمین خشیم؟
باوەرم ل ڤێ مەمللەکەتێ پەیڤا (دێ چێبیت) ئێدی یا تف دکەتە خوە، و یا نەفرەتا ل خوە دبارینیت، یا دبێژیت بتنێ هندی ئەز یا بۆ چێبوونا کارەبێ هاتیمە بکارئینان و کارەب هەر چێنەبوو، ئەز هەر شەڤ ب ستوینەکا کارەبێ یا بێ کارەب ڤە خۆ سێدارەددەم. لێ ب رۆژ بەرپرسەکێ روولاستیک و یێ درەوین من دئینیتە هەبوونێ ڤە.! بەرپرسێن مە گووتنا “ئنگلیزان” ژبیرکریە، ئەڤا دبێژیت: (بۆ ڤەشارتنا درەوەکێ مرۆڤی پێدڤی ب هزار درەوایە) لەوما گەلەک ژ وان یێن بووینە مەزنترین “درەوین” و بەس ب درەوان بزاڤا خاپاندنا مە دکەن.
لەورا گرنگە بزانین، دەنگدان تاکە رێیە کو ئەڤێن ئەم نەرازی ژ ڤێ نەدادی و بێویژدانیا ل هەمبەر مە دهێتەکرن، ڤان پاڕتان و گەندەڵان پێ سزابدەین، و دڤێت ب درویشمێن تەیسۆک و بێ بەرهەم، یێن مینا (دەنگدان ب فلانی دەنگدانە ب سەرئێخستنا هۆزا مە!، دەنگدان ب بێفانی دەنگدانە ب خوینا شەهیدان، دەنگدان ب فیساری دەنگدانە ب پێشڤەبرنا گەنجان…هتد) ئێدی نەهێینە خاپاندن، و دڤێت کەسێن (راستگۆ، دەستپاک، ژیرو ژێهاتی) بهەلبژێرین.
لێ ئەگەر ڤێجارێ ژی دەنگێ خوە بدەینە (دز، گەندەڵ، جاش، درەوین، خاک و خوهـ و خوین فرۆش)ان، و وەکی هەر جار لاڤا ژ خودێ بکەین و بێژین (یا خودا هەوارێن خوە دگەهینینە تە تۆ ڤان بەرپرسا بینییە سەر رێکا راست و ویژدانا وان بدەیە کاری کو خوە ل هەژاران بکەنە خودان)، بلا دپشتراستبین خودێ بۆ مە چێناکەت و ئەڤا چوویی دێ “لێ لێ” بیت پێش یابهێت، و دڤێت ئێدی “پت پتێ” نەکەین و سوپاسگۆزارێن ژێگرتییێن خوە بین کو دداهاتیدا بهێلن ئەم بژین و ب ساخی مە بنئاخ نەکەن.
نوونەرێ رۆژئارتیکڵ ل ئامێدی