گرنگیا هەبوونا سووپایەکێ نەتەوی و نیشتیمانی

  • (دلاوەر محەمەدشەریف زێباری- گوندێ گوندک (ئاکرێ 

هەر مللەتەک هەر وەڵاتەک سەرەڕای هندێ کو پێتڤی ب ئابوور و سیاسەتەکا ب هێز و پێشکەفتینە د هەمان دەم ژی دا پێتڤی ب سووپا و لەشکرەکێ ب هێز یێ رێکخستی و یێکگرتی و پێشکەفتینە، داکو بشێن سنورێت وەڵاتێ خۆ ب پارێزن ژ هەر هێرشەکا دەرەکی و بەڕژەوەندیێن خۆ پێ ب پارێزن.

ئەگەر ئەم ئاماژێ ب هەرێما کوردستانێ بدەین کا چەند پێتڤی ب سووپا ئانکو لەشکرەکێ یێکگرتی و ڕێکخستی یێ نەتەوی و نیشتیمانی یە، یێ دویر ژ کاریگەری و دەستتێوەردانێن حزبی و کەسی، بێگومان هەر کەسەک ل مە ئەگەر کوردپەروەر و نیشتیمانپەروەر بیت دێ هەست ب وێ چەندێ کەت کو هەرێما کوردستانێ زۆر زۆر پێتڤی پێ هەیە. ئەوژی ژبەر چەند هۆکارەکان وەکو: ١-ئەم نە خودان هێزەکا عەسمانی نە وەکو فرۆکێن شەری. ٢-ئەم نە ل سەر چ دەریا و بەحراینە کو خودان هێزەکا ئاڤی بین. ٣-ئەم نە خودان دەولەت و سەروەریەکا تمامین کو مەترسیێن دەرەکی کێم بن ل سەر مە ل دیڤ یاسایێن ناڤدەولەتی. ٤-دەوروبەرێن مە خودان ئەقلیەتەکن کو نابیت کورد ئازادبن، و ئەو ماف و تشتێ وان بخۆ دڤێت بۆ مە کوردان ب ڕەوا نابینن. ٥-هەر وەڵاتەکێ سووپایەکێ ب هێزێ نیشتیمانی نەبیت و هەڤڕکیێن ناڤخۆی زۆربن ئەو وەڵات کاندیدە بۆ داگیرکرنێ ژلایێ داگیرکەرانڤە، و دەست تێوەردانێن دەرەکی. ٦-ئەگەر سووپایەکێ نەتەوی و نیشتیمانی مە هەبیت دێ ژ شەڕێن ناڤخوی دویر کەڤین و دەرفەتا بەرقەراربوونا دیموکراسیێ دێ زێدەتر بیت. ٧-هەبوونا سووپایەکێ نیشتیمانی و نەتەوی هۆکارەکە بۆ وێ چەندێ کو وەڵات پتر یێ پاراستی بیت ژ داگیرکرنێ و هەڤدوو تۆمەتبارکرن ب خیانەتێ و رادەستکرنێ، هەروەکی مە هەمیا دیتی و گولێ بووی کا چەند حزبێن چەکدار ل دەمێ بانگەشا پەڕلەمانێ عراقێ هەڤدوو تۆمەتبار دکر ب فرۆتن و خیانەتا ۱٦ ئۆکتۆبەرێ و ڕادەستکرنا شنگالێ، بێگومان ئەگەر خودان سووپایەکێ نیشتیمانی باین نە هند زوی کەرکووک و شنگال دهاتنە داگیرکرن و هەڤدوو تۆمەتبارکرن ب خیانەتێ و ڕادەستکرنێ ژی نەدبی. ٨-هەبوونا سووپایەکێ نیشتیمانی هۆکارەکە بو وێ چەندێ کو نەیار و نەحەزێن مە زوی ب زوی جرئەتێ نەدەنە خۆ هزر د داگیرکرنا وەڵاتێ مەدا بکەن. ٩-وەڵاتێن زلهێز دێ پتر رەفتارێ دگەل مە کەن ئەگەر خودان سووپایەکێ نیشتیمانی بین، چونکی زۆر جاران وەڵاتێن زلهێز بخۆ داخاز یا ل بەرپرسێن هەرێمێ کری کو سووپایێ خۆ ڕێک بێخن، رەدکرنا داخازیا وان بێگومان دێ بیتە هۆکار کو پشتگیریا مە نەکەن ل ئاستێ پێتڤی. ١٠-بەری مە بەحسی دەولەتبوونێ کربا گرنگ بی مە سووپایەکێ نیشتمانی ئاڤاکربا چونکی سوپا و هێزا لەشکری یا پێشکەفتی و ڕێکخستی یێک ژ پێتڤیێن دەولەتبوونێ نە. نابیت د وەڵاتەکی دا دوو هێز، دوو ئاسایش، دوو دژەتیرور دوو دەزگەهێن هەواڵگیریێ هەبن. چونکی ئەو وەڵات چ جاران پێشکەفتنێ بخۆڤە نابینیت بەردەوام دێ دناڤ هەڤرکی و ئاریشان دا بیت.

ئەڤێن ل سەری من ئاماژە پێ دای هندەک ژوان هۆکارانە کو گرنگە ئەم ببینە خودا سووپا و لەشکرەکێ نەتەوی و نیشتیمانی یێ مۆدێرن ل سەر بنەمایێن زانستێ سەربازی دویر ژ دەستتێوەردانێن حزبی و کەسی. بەلێ مخابن بەرپرسێن هەرێمێ یێن هەردوو حزبێن دەسەڵاتدار کو خۆ ب خودانێ پێشمەرگەی دزانن، هەتا نوکە دوو دلن ونەد ڕژدن ل سەر رێکخستنا پێشمەرگەی و ئاڤاکرنا سووپایەکێ ڕێکخستی. چونکی وان هەمی دەما پێشمەرگە بۆ بەڕژەوەندیێن خۆ یێن حزبی و کەسی و تایبەت و هەڤرکیێن حزبی دا بکار ئیناینە و بکار دئینن ژی. بۆ نموونە کارەساتا شەڕێ ناڤخۆ کو د هەڤڕکیێن حزبی و شەخسی دا پێشمەڕکە، کورە فەقیر و ژارێن ڤی مللەتی بکار ئینان و شەڕ پێ کر ب هزاران بوونه قوربانی، یێک ژوان هەر برایەکێ من بی کو وی خۆ ژبۆ ڕوژا شەهیانا خۆ بەرهەڤ دکر. لێ مخابن بیە قوربانیێ شەڕێ ناڤخۆ ژئەنجامێ نەبوونا سووپایەکێ نیشتیمانی.

بەلێ مخابن پشتی ڤێ کارەساتێ هێشتا هەردوو حزبێن دەسەڵاتدار ل ئاستێ پێتڤی وانە و سەربور ژ ڕابردویێ خۆ وەرنەگرتیە. هەتا ڤێ گاڤێ ئەز یێ دوێ باوەرێ دا کو ئەگەر کەسەکی بڤێت ببیتە پێشمەرگە و بەرگریێ ژ گەل و وەڵاتێ ۆ وبکەت پێتڤیە سەر ب یێک ژ وان هەردوو حزبێن دەسەڵاتدار بیت و تەسکیا حزبی هەبیت، هەتا بشێت ببیتە پێشمەرگە!، هۆکارەکێ دی کو هەردوو حزبێن دەسەڵاتدار نەهێلن ببینە خودان سووپایەکێ نیشتیمانی ئەوە کو ل دەمێ بانگەشە و پرۆپاگەندێن هەلبژارتنان بخۆ بانگەشێ ب پێشمەرگەی و خوینا شەهیدان دکەن، بانگەشا وێ چندێ دکەن کو حزبێن دی جنە کریە تنێ ئەمین بەرگریێ ل وەڵاتی دکەین، تنێ مە شەهید یێن داین، د ماوێ ۲۷ ساڵێن حوکمڕانیێ دا چ دەسکەفتێن هندێن مەزن نینە کو بخۆ بکار بینن د بانگەشا هەلبژارتنان دا کو ڕۆژ بۆ ڕۆژێ رەوشا ژیانا خەلکی خراپترە ژ نەبوونا پڕۆژە و خزمەتگوزاریان، و نەبوونا دادپەروەریێ و نەبوونا سەروەریا یاسای. لەوما دێ پڕۆپاگەندێ بخۆ ب خوینا شەهید و کورە فەقیرا کەن. چونکی هزر دکەن سەر بڵندیە کو زۆر کەس ببنە قوربانی، ئەگەر سووپایەکێ نیشتیمانی مە هەبا ژلایێ کەسێن پسپۆر د بوارێ زانستێ سەربازیدا سەرپەرشتی کربا دویر ژ دەستتێوەردانێن حزبا، و چاڤێ مە ل وەڵاتان نەبا کا کی ب خێرا خۆ دێ هێت مەشق و ڕاهێنانێ ب مەکەت و کی دێ ڕاتبی بۆ مە دابین کەت. بێگومان شەهید ژی هند زۆر نەدبین کو ل پرۆپاگەندێن هەلبژارتنا بکار بینن، و دلێ هند دایکان نەدسۆت، هند زارۆک بێ باب نەدمان هند ژن بێ زەڵام نەدمان، هندی ئەم خودانێ ڤان بەرپرسان بین کو چاڤێ وان تنێ ل بەڕژەوەندیێن وان یێن حزبی و شەخسی بیت ئەم د خەونێ ژی دا دەولەتبوونێ زەحمەتە ببینین. لەوما پێتڤیە واز ل بیر تەسکیێ و بەڕژەوەندیێن تایبەت بینن و پێکڤە دەست لناڤ دەست کار بکەن ل پێناڤی بەرژەوەندیێن گەل و وەڵاتی، و سووپایەکێ نەتەوی و نیشتیمانی ئاڤابکەن، پاشی هزر د دەولەتبوونێ دا بکەن.

  • قوتابیێ زانکۆیێ

Leave a Comment